Çalakgerê greva birçîbûnê Vedad Hesass bi daxuyaniyekê ragihand ku çalakiya xwe bi dawî dike. Hesass diyar kir ku ew gihîştin armanca xwe û wan pergala heyî hejand
Vedat Hesass ê di 16’ê çileyê de li Girtîgeha Jimar 5 a Sîlîvriyê ji bo rakirina tecrîda girankirî ya li ser Rêberê Gelê Kurd Abdullah Ocalan dest bi çalakiya greva birçîbûnê ya bêdem û bêdorveger kir. Hesass di 16’ê gulanê de ji girtîgehê derket û çalakiya xwe li mala xwe ya Başakşehîr a Stenbolê berdewam kir.
Hesass piştî ku Ocalan bi rêya parêzerên xwe peyamek parve kir û xwest ku çalakiyên greva birçîbûnê û rojiya mirinê bi dawî bibin, Hesass jî daxuyaniyek da û got ku çalakiya xwe bi dawî dike. Hesass da zanîn ku daxuyaniya Ocalan aştiyane bû.
Di berdewamê de jî Hesass wiha got: “Ji bo ku mirov zirarê nebînin, daxuyaniyek mirovî bû. Çalakiya me pargala heyî hejand. Em gehiştin armanca xwe û biserketin. Ji ber ku em di çalakiya xwe de bi biryar bûn. Rola dayikan pir mezin bû. Bersiveke mezin dan faşîzmê. Bi taybetî ez têkoşîna dayikan û ya hemû hevalan pîroz dikim û wan silav dikim.” STENBOL
