Hêrişê cerganê DAIŞî û yê dewleta tirke ke serê dagirkerîye, çinîkerdişê kurdan û talankerdişê erdê Kurdistanî û hesabanê serê kurdan de pê kerdî bi serran o dewam keno la kenê nêkenê nêeşkenê bi kurdan çonk bidî ronayîş. Çimkî rojawanî de xoverdayîşêk efsanewî ame dayîş û vilayê pêroyê dinya bî. Xoverdayîş û têkoşînê kurdan kewt merheleyêka newe û dima ra hêrişê dagirkerî zêdîyayî. Nê hêrişan de xeylê kesî ameyî qetilkerdiş, remnayîş, birîndarkerdiş û xeylê kesî zî mecbur mendî ke herra xo ra koç bikerî. Înan ra yew zîn Romîna Sîdoya 20 serre îşxalê dewleta tirke ra dima neçare mende ke Efrînî ra koç bikera ya. Romînaya ke Cindirêsî ra ya kemane cênena.
Romîna pare kerd ke aye bi teşwîqê babîyê xo dest pê kemane kerdo û vat: “Mi Akademîya Muzîkî de vengê kemane eşnawit û mi kemane weçînaye. Ez roje de 6 saetan xebitîyayêne. Her ke şi mi hîna zaf kemane ra hes kerd. Wexto ke ma koçê Şehba kerd mi kemana xo zî xo de arde. Serrêke ra pey ma reyna dest pê perwerdeyî kerd. Dima ma komêke awan kerde. Wexto ke Merkezê Kulturî yê Şehîde Hêva ronîya ma zî şîyî uca.”
‘Wexto cergan eşt keyeyê ma ser, mi verî kemana xo girewte’
Romîna qiseykerdişê xo yê peyênan de qala rewşa muzîkî ya Şehbaye kerd û wina peynî ard: “Şehba de mamostayê muzîkî tay bîyî. Coka mi Şehba de dest pê mamostatîya muzîkî kerde. Dima hûmara wendekaranê ke wazenê kemane bimusê zêdîyayê. Wexto ke Efrîn de cergan eşt keyeyê ma ser, mi verî kemana xo girewte. Çunke kemane parçeyêkê cuya min a.” ŞEHBA
