Şaristanê Silêmanî yê Başûrê Kurdîstanî de serkêşîya Komîteya Abdullah Ocalanî rê Azadîye de çarçewa Hemleya ‘Abdullah Ocalanî rê Azadîye, Meseleya Kurdan rê Çareserîya Sîyasîye’ de panelêk ame kerdene. Beşdaranê panelê bi nameyê ‘Konfederalîzmo Demokratîk Çareserîya Haştîye û Pîyaciwîyayîşê Şaran a’ Dr. Hekîm Abdulkerîm, Berpirsîyara Dîplomasî ya KJARî Rozerîne Kemanger û Hemsereka Têgêrayîşê Azadîye Tara Hisên û Endamê Komîteya Abdullah Ocalanî rê Azadîye Şalaw Mehmûdî ANFyî rê hemle ser o ercnayîşî kerdî.
Berpirsîyara Dîplomasî ya KJARî Rozerîn Kemangere ard ziwan ke Rayberê Şarê Kurdî pawitişnameyanê xo de qala krîzan û çareserîyan kerda. Rozerîne vat: ”Birêz Ocalanî da zanayene ke rayîrê çareserîya krîzan caardişê Neteweya Demokratîke û Modernîteya Demokratîke yo. Rayber Apo rayberê pêro şaran û cinîyan o. Ey tim îradeyê cinîyan esas kerdêne. Dewleta tirke 1999 ra nata Rayber Apoyî tecrîd kena ke wa o şarî de têkilîye nêvirazo. La Rayber Apoyî bi kitabanê xo, fikrê xo şarî reyde pare kerdî. Cinî û ciwanî bi xurtî wayîrê na hemle vejîyenê. Heta ke Rayber Apo azad bibo ma do çarçewa hemle de bixebitê û nêvinderê.”
‘Azadîya Birêz Ocalanî pêro şaran eleqedar keno’
Dr. Hekîm Ebdulkerîmî dîyar kerd ke Hemleya ‘Abdullah Ocalanî rê Azadîye, Meseleya Kurdan rê Çareserîya Sîyasîye’ 74 merkezan ra zêdeyêran de dîyaya destpêkerdene û pêro şar û azadîgîran paştî daye hemle. Ebdulkerîmî vat: “Azadîya Birêz Ocalanî pêro şaran eleqedar keno. Coka wayîrvejîyayîşê Rayber Apoyî wayîrvejîyayîşê xeyalêkê neweyî yo. Ganî ma sey roşnvîr, akademîsyen û sîyasetmedaran hîna zaf tezanê Birêz Ocalanî bidê şinasnayene û nînan ser o bixebitê. Çareserîye bi ronîyayîşê sîstemê Konfederalîzmê Demokratîkî mumkîn a.”
‘Kapîtalîzm nêwazeno meseleya kurdan çareser biba’
Hemsereka Tevgera Azadî Tara Hisên vat: “Ganî Başûr bibo merkez û serkêşê Hemleya ‘Abdullah Ocalanî rê Azadîye, Meseleya Kurdan rê Çareserîya Sîyasîye.’ Ganî bi taybetî cinîyê Başûrî tewrê na hemle bibê. Ganî ma bikerê ke Birêz Ocalan azad bibo û meseleya kurdan bêra çareserkerdene. Birêz Ocalan ewro hetê sîstemê kapîtalîstî ra yeno tecrîdkerdene. Çunke kapîtalîzm nêwazeno meseleya kurdan çareser biba. E venga pêro roşnvîran, nuştoxan û şarê ma dana ke wa wayîrê dewaya Ocalanî û dewaya kurdan vejîyê.”
‘Îdeolojîya Rayber Apoyî bidê şinasnayene’
Şalaw Mehmûdîyî vat: “Iraq û Başûr de ma serranê peyênan de seba azadîya Rayberê Şarê Kurdî Abdullah Ocalanî xeylêk çalakî û aktîvîteyî kerdî. Ma kerd ke şarî rê felsefe û îdeolojîya Rayber Apoyî bidê şinasnayene. Xora şarê Başûrî ganî her kesî ra zêdeyêr fikranê Rayber Apoyî bişinasno. Ganî ma pêro îmkananê xo seba azadîya Rayber Apoyî seferber bikerê. Çunke azadîya ey berê çareserîya meseleya kurdan do abikera, xo de haştîye û cuya hempare bîyara.” SILÊMANÎ
