Wekîlanê HDPyî vera tecrîdkerdişê Rayberê Şarê Kurdî Abdullah Ocalanî verê Wezîrîya Edaletî de çalakîya Nobeta Edaletî dabî destpêkerdene. Wekîlê HDPyî yê Riha Omer Ocalanî derheqê Nobeta Edaletî de û tecrîdê Îmraliyî de ANFyî rê qisey kerd.
Omer Ocalanî ard ziwan ke bingeyê meseleyanê komelkîyan, alozîya komelî, polîtîkayanê îmha û mergî 2015 de Îmrali de dest pêkerdo û vat: ”2015 ra nata tecrîdêko giran est o û 21 mengî yo Abdullah Ocalan de pêvînayîş nêno kerdene. Ma seba wedaritişê tecrîdî xeylêk xebatî kerdî, ma Ewropa de zî xebatî kerdî. Netîceya nînan de CPTyî êlule de Îmrali zîyaret kerd. La eşkerayîya Buroyê Huqûqî yê Asrinî ra dima ma pê kewtî şik ke CPTyî Îmrali de Abdullah Ocalan de pêvînayîş kerdo yan nê.”
‘Heta ke na bêhuqûqîye biqeda ma do têkoşînê xo dewam bikerê’
Ocalanî bale ant Nobeta Edaletî ya wekîlan ser û wina vat: “Seba ke tecrîd bêro wedaritene û rewşe zelal biba ma Nobeta Edaletî kenê. Heta ke tecrîd biqedo, netîce bêra girewtene û waştişê ma yê meşrû û demokratîkî bêrê qebulkerdene ma do Nobeta Edaletî rê dewam bikerê. Nika Îmrali de huqûq nêno caardene. Heta ke na bêhuqûqîye biqeda ma do têkoşînê xo rê dewam bikerê.”
‘Ma do muracatanê xo de israr bikerê’
Ocalanî pare kerd ke ê hem sey keyeyî, hem sey wekîlî seba pêvînayîşî muracatî kenê û weşîya Abdullah Ocalanî ra qerqilîyenê. Omer Ocalanî vat: “Cewab nêdîyeno muracatan. Ez hewte de di reyî muracatî kena. Ma do muracatanê xo de israr bikerê. Seba ke şar AKP-MHPyî ra bixeliso tek rayîr est o û o zî pêvînayîşê bi abdullah Ocalanî yo. Ganî Birêz Abdullah Ocalanî fikranê xo rayaumûmîye de vila bikero.” ANQARA
