Di 4’ê sibatê de li navçeya Miks a Wanê aşût bi ser mînîbuseke rêwiyan de hatibû. Di encama xebatên lêgerînê de cenazeyên 5 welatiyan hatibûn derxistin, 6 welatî hatibûn rizgarkirin û ji bo dîtina cenazeyên du welatiyên din jî xebatên lêgerînê hatibûn destpêkirin. Lê duh dema ku xebatên lêgerînê dihatin kirin, li heman dolê aşûteke din jî hatibû û zêdetirî 50 welatî, xebatkar, leşker û cerdevan di bin aşûtê de mabûn.
Li gorî agahiyan, hejmara welatiyên ku di bin aşûtê de jiyana xwe ji dest dane bû 41. Hat ragihandin ku di bobelata aşûtê de nêzî 100 kes jî birîndar bûne. Ji bo derxistina welatiyên din ên di bin aşûtê de mane, îro jî xebat tên meşandin.
Xebatên lêgerînê didomin
Komên xebatê yên ku ji bajarên cuda hatin cihê bûyerê, beşdarî xebatên lêgerînê bûn. Di encama xebata serê sibehê de cenazeyek û piştî nîvro jî cenazeyeke din hatin dîtin. Têkildarî hejmara kesên di bin aşûtê jiyana xwe ji dest dane agahiyeke zelal nîne. WAN
