HDP a Rihayê têkildarî berxwedana greva birçîbûnê ya dorveger û bêdem ku li dijî tecrîd û azadiya Rêberê Gelê Kurd Abdullah Ocalan ji 27’ê Mijdara 2020’an ve li girtîgehan hatiye destpêkirin, daxuyaniyek da. Daxuyanî li ber avahiya rêxistina partiyê ya navçeya Karakopruyê hate dayîn û parlamenterên HDP’ê Omer Ocalan, Nûsrettîn Maçîn û Ayşe Surucu, endamên partiyê, xizmên girtiyan û gelek kes tev li bûn.
Parlamenter Nûsrettîn Maçîn bal kişand ser zext û zordariya li girtîgehan û wiha got: “Eger bi rastî jî hûn dixwazin reforma hiqûqê bikin, gava destpêkê ya vê yekê rakirina tecrîda li Îmraliyê ye, başkirina şert û mercên li girtîgehan e.”
Parlamenter Omer Ocalan jî bi bîr xist ku tecrîd 22 sal in dewam dike û ev tişt anî ziman: “Li dijî Abdullah Ocalan û gelê kurd polîtîkayeke qirêj tê meşandin. Tecrîd li her cihî belav bûye.”
Omer Ocalan ragihand ku li Tirkiyeyê siyaset xitimiye û wiha got: “Îro li girtîgehan greva birçîbûnê heye. Em dixwazin hevdîtin bê kirin, danûstandin bê kirin. Bêyî diyalogê pirsgirêk çareser nabe. Bi girtin, komkujî û zextê hûn nikarin vê civakê biqedînin.”
Omer Ocalan destnîşan kir ku dê heta dawiyê xwedî li girtiyan û têkoşîna wan derkevin. RIHA
