Di danê sibehê de polîsan bi ser mala hevşaredara Qoserê Nîlufer Elîk Yilmaz û cîgira hevşaredarên Qoserê Dîlber Sulhan de girt. Di serdegirtinê de Yilmaz û Sulhan hatin binçavkirin
Polîsên dewleta tirk îro di danê sibehê de li navçeya Qoser a Mêrdînê bi ser mala hevşaredara Şaredariya Qoserê Nîlufer Elîk Yilmaz û cîgira hevşaredarên Qoserê Dîlber Sulhan de girt. Yilmaz di 4’ê mijdarê de li ser fermana wezareta karên hundir ji peywirê hatibû girtin û li şûna wê qeyûm hatibû tayînkirin. Polîsan li malan lêgerîn kir û piştre jî Yilmaz û Sulhan binçav kirin.
Hat zanîn ku Yilmaz û Sulhan di çarçoveya lêpirsîneke ji aliyê Serdozgeriya Komarê ya Mêrdînê ve hatiye destpêkirin de hatine binçavkirin. Yilmaz û Sulhan li Midûriyeta Polîsan a Mêrdînê tên girtin.
Têkildarî binçavkirina Yilmaz û Sulhan de tu agahî bi parêzeran re nehatin parvekirin.
Li aliyê din hat ragihandin ku polîsan bi ser mala hevşaredarê Qoserê Zeynî Îpek de jî girtine lê ji ber ku Îpek li malê nebû, nehatiye binçavkirin. MÊRDÎN
