Hevşaredarên Şaredariya Pasûr a Amedê Mehmet Fatîh Taş û Fatma Ay û 3 kesên ku bi wan re girtî dihatin darizandin, di danişîna xwe ya yekemîn de tehliye bûn
Hevşaredarên Şaredariya Pasûr a Amedê Mehmet Fatîh Taş û Fatma Ay, piştî bûyera di 12’ê îlonê de ya li gundê Beyrokê yê Pasûrê ku tê de 7 kes mirîbûn, ji peywirê hatibûn dûrxistin û hatibûn girtin.
Danişîna yekemîn a doza ku li hevşaredaran hatibû vekirin, li 9’emîn Dadgeha Cezayên Giran a Amedê hate dîtin. Her du hevşaredar ji girtîgehên ku lê girtî ne, bi rêya SEGBÎS’ê tev li danişînê bûn.
Hevşaredar Taş û Ay û hevserokê Partiya Demokratîk a Gelan (HDP) yê Pasûrê Abîdîn Karaman, midûrê Karên Fenê yê Şaredariya Pasûrê Şener Aktaş û Mehmet Emîn Ay ku bi wan re hatibûn girtin, tehliye bûn. AMED
