Hevşaredarên Şaredariya Qersê Şevîn Alaca û Ayhan Bîlgen bi gel re civiyan. Di civînê de hevşaredaran da zanîn ku bêyî ku bikevin nava fanatîzma partiyan, dê bajarê xwe bi hev re birêve bibin û pirsgirêkên xwe çareser bikin
Di hilbijartina rêveberiyên herêmî de li bajarê Qersê, namzetên Partiya Demokratîk a Gelan (HDP) Şevîn Alaca û Ayhan Bîlgen bi ser ketin. Hevşaredarên Şaredariya Qersê Alaca û Bîlgen piştî ku bi ser ketin, bi gel re hatin cem hev.
Di hevdîtina bi gel re hevşaredar Şevîn Alaca anî ziman ku ew ê gelê Qersê tev li pêvajoya biryardayînê bikin û bajarê xwe bi hev re birêve bibin. Alaca spasiyên xwe pêşkeşî hemû welatiyên Qersê yên ku çûn ser sindoqê, kirin.
Hevşaredar Ayhan Bîlgen jî destnîşan kir ku pirsgirêkên lezgîn ên ku divê li Qersê bên çareserkirin hene û wiha domand: “Em ê Qersê bi hevre birêve bibin. Me pêşbirka hilbijartinê duh qedand. Em bêyî têkevin nava fenatîzma partiyan, em ê bi hemû gelên Qersê re bajar birêve bibin û pirsgirêkên bajar bi hevre çareser bikin. Gelê bajar xizmetê dixwaze.” QERS
