Hevserokên HDP’ê Pervîn Buldan û Sezaî Temellî li Stenbolê dengê xwe dan. Piştî dengdayînê Buldan got ku tevî hemû astengiyan jî erka xwe xwe pêk anî ne û wiha got: “Divê gelê me jî li ser sindoqan erka xwe pêk bîne. Ez ê encamên hilbijartinê li Amedê bişopînim. Temaşekirina çûna qeyûman a li Amedê dê bêhtir zewqê bide min.”
Hevserokên Partiya Demokratîk a Gelan (HDP) Pervîn Buldan û Sezaî Temellî ji bo dengdayînê, çûn ser sindoqê. Pervîn Buldan li dibistaneke Semta Florya ya Bakirkoy a Stenbolê tevî Cîgirê Hevserokên HDP’ê Azad Bariş, endama Meclisa Hatîce Odemîş û hevseroka HDP’ê ya Stenbolê Esengul Demîr çû ser sindoqê û dengê xwe da. Sezaî Temellî û hevjîna xwe jî li dibistaneke li Semta Yeşîlkoy a Bakirkoyê dengê xwe dan.
Piştî dengdayînê jî Pervîn Buldan daxuyaniyeke kin da çapemeniyê. Buldan diyar kir ku wan pêvajoyeke bi têr û tejî derbas kir û wiha got: “Di esasê xwe de me her tişt kir û ji bo pêşeroja Tirkiyeyê me gelek tişt gotin. Tu televîzyonan xebatên me nedîtin. Gelek astengî li pêşiya me hebûn. Lê tevî vê yekê jî em xebitîn. Di her mîtîngekî de gef li me hatin xwarin. Lê me îro erka xwe pêk anî. Ez di wê baweriyê de me ku gelên me jî dê îro li ser sindoqan erka xwe pêk bînin. Piştî dengdayînê ez ê biçim Amedê. Ji Amedê temaşekirina şandina qeyûman dê zewqekî mezintir bide min.”
Sezaî Temellî jî dengê xwe da. Temellî piştî dengê xwe da jî derbasî Enqereyê bû. Hat zanîn ku Temellî dê encamên hilbijartinê li Navenda Giştî ya HDP’ê bişopîne. STENBOL
