Li gorî agahiyên bi dest ketine, piştî ku Artêşa Tirk a dagirker li gundê Bermîze yê herêma Biradost bi cih bû, ji dawiya sala 2017’an ve hewl dide, çand, siyaset û zimanê tirkî li ser wê herêmê serwer bike. Ji bo vê armancê leşkerên tirk serdana dibistanên li herêmê kirine û pêwîstî û tişt ji xwendekaran re birîne. Bi xwendekaran re hatine gel hev û xwestine ku xwendekar dersên tirkî bixwînin.
Rêveberê Perwerdeya Soran Ezîz Seîd ev agahiyên Rojnews’ê piştrast kir û got: “Ji berî 2 salan Tirkiyeyê hewl da pêwîstiyên dibistanên herêma Biradost pêşwazî bike. Heta xwestin avahiya dibistanê nûjen bikin, lê zû Wezareta Perwerdeyê ji vê hewldana dewleta tirk a dagirker hat agahdarkirin û me rê li vî karê dewleta tirk girt.”
Herwiha Cîgirê Şaxê Yekitiya Mamostayên Kurdistanê ya Hewlêrê Newzad Omer li ser heman mijarê ji Rojnews’ê re axivî û got: “Dewleta tirk bi dehan kîlometre xaka Kurdistanê dagir kiriye. Her bi vê re jî nerawestiya ye, dixwaze çand, fikir û nêrîna xwe fêrî zaroken me bike. Ev jî nayê qebûl kirin û divê Hikûmeta Herêmê helwest li ser hebe. Erka yekem û cewherî ya Hikûmeta Herêmê ew e ku xwe bi hikûmeta rewa ya vê herêmê dibîne, rê nede vê diyardeyê û tiştek wiha li herêma me de hebe. Nabe fikir û nêrîna welatek din têkelî ya welatê me were kirin û zarokên me li ser were perwerdekirin.”
Newzad Omer diyar kir ku ev tevgera Tirkiyeyê ya li ser sînoran bandoriyê li ser navendên xwendikê dike û wiha domand: “Ji ber ku wê herî dawî ev yek wiha bike, tiştên biyanî bikevin guhê zarokên me de. Yan jî çanda neteweke din têkelî çanda pewerdeya welatê me bibe ku ev jî nayê qebûl kirin. Divê Hikûmeta Herêmê ku xwe xwediyê vê herêmê dibîne pêşiya vê tevgera dagirkeran bigire.”
