Danişîna doza Selahattîn Demîrtaş hate dîtin. Heyeta dadgehê bi yek dengî biryara berdana Demîrtaş da. Lê ji ber 4 sal û 8 meh cezayê Demîrtaş heye nayê berdan
Danişîna 11’emîn a doza hevserokê HDP’ê yê berê Selahattîn Demîrtaş, li 19’emîn Dadgeha Cezayê Giran a Enqereyê ya li Kampusa Girtîgeha Sîncanê hate dîtin. Demîrtaş û parêzerên wî tev li danişînê nebûn. Heyeta dadgehê der barê Demîrtaş de bi yek dengî biryara berdanê dan.
Têkildarî mijarê parêzerê Selahattîn Demîrtaş, Ramazan Demîr li ser hesaba xwe ya twîtterê agahî parve kirin û wiha got: “Demîrtaş ji doza jê hatiye girtin tê darizandin bi yek dengî hate berdan. Biryar di danişîna ku Demîrtaş û parêzerê wî tê de ne amade bûn, dan. Lê ji ber der barê Demîrtaş de 4 sal û 8 meh ceza heye, Demîrtaş wê neyê tehliyekirin.”
‘Divê bê berdan’
Der barê mijarê de parlamentera HDP’ê ya Sêrtê Meral Daniş Beştaş jî twîtek parve kir û wiha got: “Ji bo cezayê hepsê yê 4 sal û 8 mehan jî dê serledan bê kirin. Demîrtaş 2 sal û 10 meh in girtî ye. Li gori biryarên dadgeha bilind, 1 salek berdana bi kontrol jî di nava vî cezayî de ye. Ji ber vê yekê divê bêyî dereng bimîne Demîrtaş bê berdan.” ENQERE
