Hêzên Rûsyayê êrîş û dorpêça xwe ya li ser bajarên Ukraynayê didomînin. Serokê Ukraynayê Volodymyr Zelensky Moskov tawanbar kir ku korîdorên mirovî dike armanc. Hîn jî bi sedan sivîl li bajarên Ukraynayê asê mane. Hemwextî vê yekê piştî diyalogên di navbera wezîrên karên derve yên Rûsya û Ukraynayê de bi dawî bûn, bombebarana Rûsyayê dest pê kir.
Meclisa Ewlehiyê ya Neteweyên Yekbûyî bi daxwaza ji Rûsyayê da ku “çekên biyolojîk” nîqaş bikin, dê civîneke awarte li dar bixe.
Rûsyayê jî hikumeta Kîevê tawanbar kir ku bi DYA’yê re hevkariyê dike da ku çekên biyolojîk çêke, lê DYA û Ukraynayê ev yek derewand.
Hêzên Rûsyayê heta niha herî kêm 4 bajarên mezin dorpêç kirine û hêzên wê gihaştine bakurê Kîevê.
AFP`ê jî ragihand ku rayedarên Ukraynayê gotine derdora sed hezar kes ji bajarê Somê yê li bakurê rojhilatê welêt û bajarê Isium û herêmên bakurê rojavayê Kîevê derketine. Ev geşedan piştî hevdîtina wezîrên karên derve pêk hatin.
Her wiha rayedarên Ewropayê ev 2 roj e têkildarî bandorên liv û tevgerên leşkerî yên Rûsyayê yên li Ukraynayê li hev civiyane.
