Dimayê erdlerzê merkezê ci Mereş bi 11 bajarî ci ra tesîr bî û bi deshezaran kesî binê xirbeyan de mendî û dinyaya xo bedelnayî. Yew nê bajaran ra zî Semsûr bi. Selahîyetdarî û AFAD roja 6ine de şî Semsûr ewnîyayî xirbeyan ra û vejîyayî. Welatijan bi îmkananê xo cenazeyanê xo vetî û deshezaran kesî bêkefen û bêşûtiş ameyî definkerdiş.
Semsûr de cinîya bi nameyê Hanim Gulmeze hîrê kênayê xo erdlerz de vînî kerd. Ma şî keyeyê şînî ke Hanime û merdimê aye dayê ro. Hanime reaksîyonê xo yê hemverê îqtîdarî ard ziwan.
Seba tutanê xo bido wendiş şuxulîya
Hanim Gulmeza ke kurdêke elewî ya, dewa Kozanî ya Semsûrî de bi pesdewarî cuya xo dewam kerdêne û bi serran bi rotişê şit û penîr 4 kênayanê xo daya wendiş. Hîrê kênayê aye unîversîta qedênenê û Semsur de karê cîya de şuxulênê. Hanime pêwa heme nêweşîyanê xo paştdayîşê seba kênayanê xo nêda kîşte.
35 kîlometre rayîr ra şinê
Kênaya aye Gurbet (27), Bahar (24) û Gokçen (22) Semsûr de cuyayêne û dimayê erdlerzî Hanime kewena emdîşeyan mîyan. Aye û mêrdeyê xo 35 kîlometre rayîr şinê û şinê vere awanîya tutanê xo. Awanîya ke tutanê înan tede mendêne rijîya bî.
9 rojan verê xirbanî de mendî
Hanim û hemwelatîyê bînî 9 rojan serê xirbê awanîye de vindertî la vîşêrê zerrîwaz û kedkaranê madenî tu kesêk hetkarîya înan nêkerd. Keye bi îmkananê xo vinç benê û yew deqa zî uca ra nêşinê. Bi umudê kênayê aye weş binê xirbî ra biveja pawenê.
Roja 9ine de bi hewldayîşê zerrîwazan 3 kênayê aye û hemwelatîyê bînî binê xirbî ra yenê vetiş. Musenê ke Gurbet, Bahar û Gokçeye wextê erdlerzî de hewl dane ke biremê la koridor de manenê. Hanime dîyar kerd ke cenazeye kênayanê xo benê dewa xo de defin kenê mezelê înan ser de hirê vilikî ronayî.
AFAD cewab nêda!
Hanime reaksîyonêk gird mojnaye nizdîbîyayîşê îqtîdarî û wina dewam kerd: “Dewlete çin a. 9 rojî tutê mi binê xirbî de mendî. Dest û lingê ma girêdaye bî. Ma wina xo rê serê xirbî de vindertî. Ka dewlete? Merdime AKPyîyan gêrayî. Ma AFADî gêrayî la cewab nêda ma. Dewlete bêçareyan rê çin a. Îqtîdar tu çîyêk seba şarî nêkerd. Tayyîp Erdogan ame Semsûr û helalî waşt. Ez ci helal nêkena. Wa heqê mi ci rê bibo jehr.”
Hanime bi kurdî lorêna, dej û hêrsê xo ard ziwan ser. Hanime nika kênaya xo ya 18 serrî ke tena aye mende ra hêz gêna. Hanime vat ke kênaya aye Gurbet xeylê heywanan ra hes kerdêne û vat ke aye do mîrasê kênayanê xo dewam bikera, seba heywanan û pêro gandaran têkoşîn bikera. SEMSÛR
