Gaye Yûrttaşa ke Dêrsimî ra ya û pîyê aye yew serrî badê Qirkerdişê Dêrsimî eskerî de ame kiştene, hîkayeya xo ya ke 1938î de dest pêkena kerde. Hîkayeya Yûrttaşe fotografê Tirkîye ya
Qirkerdişê Dêrsimî ra 81. Serrî derbaz bî, labelê hema zî birînê aye rojan çimanê hemwelatijan ra asîyeno. Hîkayeya Gaye Yûrttaşa 80 serrî nîşan dana ke qewimîyayîşê aye wextî senî tesîrê xo heta nê rojan kerdo. Yûrttaşe yew serrî badê qirkerdişî ameya dinya û aye wext pîyê aye Îbrahîm Aktûgî bi zorî berdî ekser. Pîyê Yûrttaşe skerî de tewrê 3 kesan seba ke dêrsimijbî bi daran ameyî derbkerdene û ameyo qetilkerdene. Cenazeya pîyê Yûrttaşe hema zî nêameya vînayene.
Yûrttaşa ke wayêka aye bi nameyê Hatîce estbî û hema zî vindîbîyayeya, nêzana ke kamî wext pîyê aye ameyo qetilkerdene. Wexto ke pîyê Yûrttaşe yeno qetilkerdene, keye dayîka aye sewbîna kesêk reyde dano zewicnayene û aye zî şona keyeyê kalikê xo. Heta ke dapîra aye weş a, verê înan de manena. La badê ke dapîra aye mirena, datê Yûrttaşe aye Xarpêtî ra danî keyeyêk. Yûrttaşe wexto ke dîyena keyeyê xarpêtijî hema 5 serrî û waya aye Hatîce zî hema 3 serrî bî.
Waya aye vindîbîyaye ya
Gaye Yûrttaşe wexto ke bena 13 serrî mêrdeyê dayîka aye Yûrttaşe qebûl keno û şona Dêrsimî. Labelê waya aye Hatîce Xarpêtî de manena. Aye roje ra nata nêzana ke waya aye Hatîce kamî ca de ya. Yûrttaşe dîyar kerde ke tena eşnawita waya aye yewdo amedij reyde zewicîyaya.
4 domanê Yûrttaşe tewrê PKKyî bîyî
Yûrttaşe badê ke pîl bena yewdo dêrsimij reyde zewicîyena. 13 domanê Yûrttaşe benî. Lajê aye Kazim 19 serrî yê xo de tewrê PKKyî beno û 1985î de nêwala Qesaba ya Sêrtî de cuya xo vindî keno. Labelê dewlete destêr nêdana ke cenazeya lajê xo bigîra. Badê Kazimî, na reye lajê aye Aydinî qezaya Qisle de yeno tepiştene û îşkencekerdene. Badê hedîse Aydinî tewrê PKKyî beno û serra 1997î de pêrodayîşêko Qoçgiri de cuya xo vindî keno. Aydinî ra dima Huseyîn zî eynî serrî de tewrê PKKyî beno. û 1999î de yeno tepiştene. Huseyîn 20 serrî yo ke zîndan de tewqîfkerde yo û cezaya muebbetî ci rê ameya dayene. Sewbîna lajêk Yûrttaşe zî 20 serrî verê tewrê PKKyî bîyo û heta nika tu xeberêk ci ra anêameyo girewtene.
‘Mi çim de dewlet dişmen a’
Yûrttaşe qiseykerdişê xo de dîyar kerde ke zext û zorî vera lajê aye zî surgun bîyo. Yûrttaşe badê hende qewimîyayîşan timî tewrê çalakîyanê Dêrsimî bena. Yûrttaşe daye zanayene ke tena waştişêk aye esta, aye zî aştî ya û va: “Ez emrê xo vera 2 serrî yo ke nêeşkena vejîya teber. Seba ke çîyêk destê mi ra nîno, ez ver kewena. Mi çim de dewlet dişmen a. Dewlete sere de mi bê dayîk û pî vera daye û dima ra eynî çîyan arde serê domananê mi. Kiştişê pîyê mi, vindîbîyayîşê waya mi û tewrbîyayîşê 4 domanê mi yê ke tewrê PKKyî bîyî de sebeb pêro dewlet o. Domanê mi nêmendî ke bêrî tepiştene û kiştene. Wexto ke ez merda, ganî cenazeya mi bi serreberzî bêra wedartene. Cenazeya mi daxî, ganî mesaj bida dewlete. Ez wazena ke bi hawayo serreberz bimira.” DÊRSIM
