Navenda Ragihandin û Çapemeniyê ya HPG’ê ragihand ku gerîlayan li nêzî Girê Şehîd Sarya li dijî leşkerên derketin eraziyê çalakî kirine. HPG’ê aşkara kir ku di çalakiyê de 3 leşker hatin kuştin
Navenda Ragihandin û Çapemeniyê ya HPG’ê têkildarî çalakiyên gerîla yên li dijî leşkerên tirk ên dagirker û êrîşên hewayî yên li dijî Herêmên Parastinê yên Medyayê daxuyaniyek nivîskî weşand.
HPG’ê derbarê êrîşên hewayî yên artêşa tirk de ev daxuyanî da: “Di roja 13’ê tîrmehê de balafirên şer ên artêşa tirk a dagirker bombe li Girê Şehîd Ezîz ê herêma Xakûrkê ya Herêmên Parastinê yên Medyayê barandin. Balafirên şer di roja 14’ê tîrmehê de jî saetên şevê girê Helîkopter û roja 15’ê tîrmehê (îro) jî saet di 08.00’an de kendala Girê Şikerê Spî bombeberan kirin. Piştî bombebranê artêşa TC’ê ya dagirker bi helîkopterên Skorsky leşker danîn Girê Şehîd Ezîz û Girê Helîkopterê û xwestin bicih bibin.”
Li Girê Şehîd Sarya 3 leşker hatin kuştin
Di berdewamiya daxuyaniyê de ve tişt hat ragihandin: “Hêzên me li dijî leşkerên artêşa TC’ê ya dagirker ku xwestin bikevin eraziyê û li herêma daristan daran bibirin çalakiyek lidarxist. Hêzên me li nêzî Girê Şehîd Sarya leşkerên ku xwestin derbikevin eraziyê xistin bin kontrola xwe û di roja 14’ê tîrmehê saet 11.00’an de hêzên me yekîneya dijmin kir hedef. Bi serketî li leşkerên dijmin hate xistin, 3 leşker hatin kuştin û gelek leşker jî birîndar bûn. Artêşa TC’ê ya dagirker saet di 20.00’an de kuştî û birîndarên xwe bi helîkopterên Skorsky ji herêmê rakir. Yekîneya me ya çalakî pêk anî bi silametî gihişte baregeha xwe.”
Li Colemêrgê kepçeya kar hat rûxandin
Daxuyaniya HPG’ê wiha didome: “Hêzên me di çarçoveya Pêngava Şoreşgerî ya Şehîd Bager û Şehîd Ronya de di roja 14’ê tîrmehê saet 16.00’an de li dijî makîneyên kar ên artêşa TC’ê ya dagirker ku li rêya ewlehiyê ya di navbera gundên Wargenima û Kendalokê yên navçeya Gever a Colemêrgê kar dikirin, çalakiyekî sabotajê lidarxist. Di çalakiyê de kepçeya kar a dijmin hate rûxandin, hejmara kuştî û birîndarên leşkerên tirk nehate testpît kirin.”
Êrîşên hewayî
HPG’ê di dawiya daxuyaniya xwe de jî li ser êrîşên hewayî yên artêşa tirk ev agahî parve kir: “Di roja 14’ê tîrmehê de bi derengiya şevê balafirên şer ên artêşa TC’ê ya dagirker bombe li Girê Amediyê yê navçeya Amediyê ya Dihok û herêma Gundê Filleha yê herêma Zê bombebaran kirin. Di bombebaranê de tiştek bi hêzên me nehatiye.” BEHDÎNAN
