HPG’ê bi daxuyaniyekê ragihand ku hêzên wan li navçeya Bazîd a Agiriyê li dijî wesayîteke leşkerî çalakî pêk anîne. HPG’ê diyar kir ku di encama çalakiyê de 6 leşkerên artêşa tirk hatine kuştin
Navenda Ragihandin û Çapemeniyê ya HPG’ê têkildarî çalakiyên gerîla yên li navçeya Bazîd a Agiriyê û êrîşên hewayî yên artêşa tirk daxuyaniyeke nivîskî weşand. Di daxuyaniyê de HPG’ê ragihand ku hêzên wan li Bazîdê derbên giran li artêşa tirk xistine.
Di daxuyaniya HPG’ê de hat gotin ku hêzên wan ên gerîla di 21’ê sibatê saet 04:30’an de li ser rêya gundê Zorava yê navçeya Bazîd a Agiriyê li dijî wesayîteke zirxî ya bi tîpa kobra, çalakiyeke sabotajê pêk anîne. HPG’ê destnîşan kir ku di encama çalakiyê de wesayîta zirxî bi temamî hatiye îmhakirin û 6 leşkerên dewleta tirk ên di wesayîtê de jî hatine kuştin.
Têkildarî êrîşên hewayî jî HPG’ê ev agahî dan: “Di 25’ê sibatê de balafirên şer ên artêşa TC a dagirker, saet di 12.00’an de Girê Şehîd Şahîn ê Herêma Zê û saet di 13:30’an de jî geliyê Ermûşê yê herêma Xakurkê yên Herêmên Parastinê yên Medyayê bombebaran kirin. Ji ber bombebaranê zirar negihîşt hêzên me.” BEHDÎNAN
