Qezaya Pîranî ya Amedî de û qezaya Çelê ya Colemêrgî de çalakîyanê gerîlayan de 3 eskerî ameyî kiştene. HPGyî da zanayene, herêma Zapî de rîyê bombardumananê teyareyanê şerî ra 2 gerîlayî şehdî kewtî.
Merkezê Çapemenî û Îrtîbatî yê HPGyî derheqê çalakîyanê gerîlayan û hêrişanê hewayî yê artêşa Tirkî de eşkerayîyêk weşanaye. Eşkerayîye de ame vatene: “24ê Nîsane saete 05:30 de, qezaya Pîranî ya Amedî de hêzanê ma vera eskeranê Tirkî yê îşxalkeran ê Qereqolê Girê yê Tîmî çalakîyêk viraşte. Cayêkê nêzdî ra bi çekanê ferdî û mîyanan çalakîye ameye kerdene û netîceyê çalakîye de eskerêk ame kiştene, xeylî eskerî zî bîyî birîndar. Çalakîye de hetê bînî ra dêsê qereqolî zî rijîya. Çalakîye ra dima, qereqolî ra bi çekanê giranan derûdorê wareyê çalakîye ame pirodayene û hêzanê dişmenî bi helîkopteran eskerê xo yê merdî û birîndarî herême ra vetî. Çalakîye û bombardumanî de tu zerar nêresto hêzanê ma.”
Çelê de 2 eskerî ameyî kiştene
Dewamê eşkerayî de wina ame vatene: “23ê Nîsane saete 13:30 de vera eskeranê Tirkî yê îşxalkeran ê serê Tepê Sorî yê qezaya Çelê ya Colemêrgî de hêzanê ma çalakîyêk viraşte. Derbê giranî dayî mewzîyêko 2 eskerî tede bî û netîceyê çalakîye de 2 eskerî ameyî kiştene. Çalakîye ra dima hêzanê dişmenî bi çekanê giranan da wareyê çalakîye ro. Hêzê ma bê zerar restê cayanê xo. Teyeranê şerî yê artêşa Tirkî ya îşxalkere tayê Wareyê Pawtişî yê Medya bombarduman kerdî.
Goreyê naye; 26ê Nîsane (ewro) saete 00:30 de wareyê Kunîşka yê herêma Zapî, 25ê Nîsane (vizêrî) saete 08:30 de wareyê Deşta Kafya ya Garê, şan de mabênê saetanê 20:00-20:30 de der û dorê dewa Çemrobotkî ya nehîya Çemanke ya Duhokî, 23ê Nîsane şan de saete 19:00 de Gelîya Şehîd Ozgurî ya herêma Zapî ameyî bombardumankerdene. 23ê Nîsane Zap de hêrişanê hewayî de hevalê ma Demhat û Rojhat şehîd kewtî. Hêrişanê bînan de zerar nêresto hêzanê ma. Hêrişê derûdorê dewa Çemrobotkî de bax û baxçeyê dewijan zerar dî. Zanayîşê nasnameyanê hevalanê ma yê ke şehdî bîyî bado rayapêroyî reyde do bêrê parekerdene.” BEHDÎNAN
