Gerîlayên HPG/YJA Starê, li ser rêya Bazîd-Îdirê li dijî konvoyeke ji wesayitên zirxî ya artêşa tirk çalakiye li dar xistin. Di çalakiyê de derbên giran li wesayiteke zirxî ya bi tîpa Kîrpî hatin xistin
Navenda Ragihandin û Çapemeniyê ya HPG’ê li ser çalakiyên gerîla û êrîşên hewayî daxuyaniyek da. HPG’ê di daxuyaniya xwe de aşkera kir ku hêzên wan li ser rêya Bazîd û Îdirê li konvoyeke leşkerî xistine. HPG derbarê çalakiya gerîlayan de ev agahî par ve kir: “Di çarçoveya Pêngava Serketinê ya Şoreşgerî de ku li eyaleta Serhedê didome. Hêzên me 13’ê nîsanê (doh) saet di 10.00’an de li ser rêya Bazîd-Îdirê li konvoyeke ji 5 wesayitên zirxî ya artêşa TC a mêtinger xistin. Di dema çalakiyê de hin wesayitên di nava konvoyê de ji cihê çalakiyê reviyan, wesayiteke zirxî ya bi tîpa Kîrpî jî ji ber derbên giran ên lê ketin li cihê çalakiyê ma. Ji ber derbên hêzên me xisareke mezin li wesayita zirxî bû. 3 saet piştî vê çalakiyê hêzên dijmin hatin cihê çalakiyê û enqaza wesayît û leşkerên xwe yên mirî û birîndar rakirin. Hêzên dijmin piştî vê çalakiya bi bandor, bi çekên giran bombe li derdora cihê çalakiyê barandin. Hejmara mirî û birîndarên dijmin nehate zelalkirin. Di çalakiyê de tu zerar negihişt hêzên me.”
Êrîşên hewayî
HPG’ê di berdewamiya daxuyaniya xwe de jî li ser êrîşên hewayî yên dewleta tirk ev tirş ragihand: “Di 13’ê nîsanê (doh) balafirên şer ên artêşa TC a dagirker bombe li Herêmên Parastinê yên Medyayê barandin. Li gorî vê yekê; Doh saet di 09.30’î de qada Basya ya Avaşînê, saet navbera di 11.00-11.30’î de qada Karox a Qendîlê, qada Şikefta Birîndara ya Zê, Girê Şehîd Hêmîn ê Xakurkê, saet navbera di 16.00-16:30’î de Girê Şehîd Dîren ê Avaşînê, qada Aris-Faris û Mam Reş bombe kirin. Ji ber bomberdûmanê zerar negihişt hêzên me.” BEHDÎNAN
