Merkezê Îrtîbatî û Çapemenîye yê HPGyî bi eşkerayîyêke bîlançoya menga gulane eşkera kerde.
Eşkerayîye wina ya:
”Gerîlayanê azadîye yê Kurdîstanî seba ke şarê ma yo bindest bibo wayîrê ameyoxêkê rûmetênî vera hêrişanê kolonyalîstan xoverdayîşêko tarîxî kerd û no xoverdayîş hema zî dewam keno. Hêzê ma vera her tewirê hêrişî bedenê xo kenê çeper, bi fedayîtî şer kenê û erdê Kurdîstanî bi îradeyêkê pîlî pawenê. Hêzanê ma erdlerzê 6ê sibata 2023yî ra dima eşkera kerd ke çalakî nêkerê û qasê 4 mengan wina têgêrayî. Rixmê na bire zî rejîmê AKP-MHPyî yê faşîstî û artêşa îşxalkere binê kontrolê serkêşê şerê taybetî Hulusî Akarî de hêrişanê xo rê dewam kerd. Artêşa tirke ya îşxalkere sere de Herêmê Pawitişî yê Medya pêro warê gerîlayanê azadîye yê Kurdîstanî xeylêk reyî bi teyarayanê şerî, helîkopteranê hêrişî, obus, hawan, tank û topan dayî bombayan ver, vera çeperanê xoverdayîşî yê gerîlayan çekê qedexekerdeyî û kîmyewîyî şuxilnayî, bi nê hawayî sûcê şerî kerdî. Artêşa tirke ya îşxalkere menga gulane de bi taybetî Vakurê Kurdîstanî de pêro îmkanê teknîkî şuxilnayî û bi seyan îşxalker û kontrayan operasyonê hîrayî kerdî.
Gerîlayanê azadîye yê Kurdîstan vera nê hêrişan xo pawit, serê bingeyê xopawitişî de cewab da îşxalkeran û netîceya ney de zî xeylêk reyî şer qewimîya. Artêşa îşxalkere waşt ke bi îmkananê xo yê teknîkan netîce bigêra la pê xoverdayîşê hêzanê ma nêeşkaye.
Vakurî ra heta Herêmanê Pawitişî yê Medya her war de gerîlayan vera îşxalkeran xo ver da, rayîr nêda îşxalker û kolonyalîstan, bi ruhê xoverdayîşî yê şehîdanê gulane gerîlayî wayîrê xeta têkoşînî vejîyayî û têkoşîn berz kerd. Embazanê ma Vakur de vera îşxalkeran bi hawayêkê fedayî xo ver da; Mêrdîn, Amed û Botan de xeta şehîdanê gulane de û bi ruhê Hemleya 1ê Hezîrane cewabo hewcedar da îşxalkeran.
Artêşa tirke ya îşxalkere vera xoverdayîşê gerîlayan de bêçare mende, gulane de çeperê xoverdayîşî 8 reyî pê çekanê kîmyewîyan û bombayanê qedexekerdeyan dayî hêrişan ver. Gulane de Herêmê Pawitişî yê Medya 126 reyî pê teyarayanê şerî, 11 reyî bi helîkopteranê hêrişî, 435 reyî bi hawan, obus, tank û çekanê giranan dîyayî bombayan ver. Wextê hêrişan de şer qewimîya. Şer de 54 îşxalkerî ameyî kiştene, 2 îşxalkerî birîndar bîyî. Hêrişanê dişmenî de 13 embazê ma zî şehîd bîyî.
Gerîlayanê azadîye gonîya xo çilke bi çilke rijnaye, derbê giranî dayî dişmenî ro. Têkoşînê Leyla Sorxwîn mojneno ke Kurdîstan de hêvîya azadîye qetî nêra çinkerdene. Vakurê Kurdîstanî de embazê ma Bahoz Çiya, Dilgêş Zagros, Bawer Korkmaz, Dilşêr Çiyareş, Bawer Med, Rênçber Gîvara, Şerger Caf; Herêmanê Pawitişî yê Medya de embazê ma Egîd Zîlan, Vîyan Ozgur, Dîyar Xoşnav, Botan Zagros, Bawer Zaza û Canşêr Adar tewrê karwanê şehîdan bîyî. Nê embazanê ma xeta serkewtişî de xo ver da û tewrê karwanê şehîdan bîyî.
Gerîlayê azadîye yê Kurdîstanî yê ke têkoşînê şehîdan xo rê kenê mîras û bi nê hawayî benê pîl, na dewaya heqdare ya azadîye ya şarê ma de qetî do ser bikewê.” BEHDÎNAN
