Merkezê Îrtîbatî û Çapemenîye yê HPGyî bi eşkerayîyêke nasnameyê 3 şehîdan dîyar kerdî. Eşkerayîye wina ya:
“Ma eşkerayîya xo ya 27ê teşrîna peyêne ya 2022î de dabi eşnawitene ke 25ê teşrîna peyêne de mabênê Warê Xoverdayîşî yê Girê Cûdî û Girê FMyî de operasyonanê şorişgêran de derbê giranî dîyayê artêşa tirke ya îşxalkere ro, 19 îşxalkerî ameyê cezakerdene û nê operasyonan de embazanê ma Adare, Heqî û Eyleme bi fedakarî heta nefesê xo yê peyênî şer kerdo û şehîd bîyê.
Nê embazê ma mîsalê tewr ercîyayeyî yê milîtanîya fedayî yê Apogîran bîyî û înan taktîkê gerîlatîya dewrê neweyî têzere şuxilnayî, bi nê hawayî pêser derbê tarîxî dayî artêşa îşxalkere ro. Nê embazanê ma prosesê amadekarîye ra dima pê çalakîyanê xo îsbat kerd ke bin her şertî de gerîlayî têkoşînî rê do dewam bikerê û şarê ma azad bikerê. Ma soz danê ke bi wayîrvejîyayîşê mîrasê têkoşînî yê embazanê ma Adare, Heqî û Eyleme têkoşînê înan bi serfîrazî tacîdar bikerê.
Nasnameyê embazanê ma yê şehîdan wina yê:
Nameyê Qodî: Adare Argeş
Name û Peyname: Vesîle Arvîş
Cayê Bîyayîşî: Bazîd
Maye-Pî: Gulîzare – Mustafa
Tarîx û Cayê Şehadetî: 25ê Teşrîna Peyêne ya 2022î / Zap
Nameyê Qodî: Heqî Karasungur
Name û Peyname: Omer Açan
Cayê Bîyayîşî: Çewlîg
Maye-Pî: Zahîde – Îlhamî
Tarîx û Cayê Şehadetî: 25ê Teşrîna Peyêne ya 2022î / Zap
Nameyê Qodî: Eyleme Esrîn Memyan
Name û Peyname: Nûpelda Polat
Cayê Bîyayîşî: Amed
Maye-Pî: Selahattîn – Necîbe
Tarîx û Cayê Şehadetî: 25ê Teşrîna Peyêne ya 2022î / Zap
Embaze Adare Bazîd de dadîya xo ra bena. Embaze Adara ke wak û amika ci refanê têkoşînê azadîye de şehîd bîyê, verî tewra xebetanê ciwanan bena. A 2014 de Rojawan de vera cerganê DAIŞî şer kena û 2016 de zî verê xo dana koyan, bena gerîla. Embaze Adare cade adapteya cuya gerîlatîye bena. A perwerdeyî ra dima Heftanîn de wezîfe kena û tîya de bena wayîra xeylêk tecrubeyan. Embaze Adare xo aver bena û bena fermandarêka marîfetîne ya YJA-Starî. Embaze Adare mîyanê Hêzanê Taybetan de cagêna û kena ke biba layîqa xeta azadîya cinîyan. Embaze Adare Warê Xoverdayîşî yê Girê Cûdîyî yê Zapî de de tewra xeylêk çalakîyanê serkewteyan bena û verê dişmenî gêna. Embaze Adare 25ê teşrîna peyêne de operasyonê şorişgêrî de zî derbanê giranan dana dişmenî ro û bena fermandaranê serkêşan ê YJA-Starî ra yewe.
Embaz Heqî Çewlîgo ke tira şorişgêrê pîlî vejîyayî û wayîrê kokanê welatperwerîye yo,tede mîyanê keyeyêkê welatperwerî de dadîya xo ra beno. Embaz Heqî verî tewrê xebetanê ciwanan beno. 2013 de wexto ke o ODTU de wendekar bi, embaz Heqî xeyalê domanîya xo ano ca û pa komêka embazan verê xo dano koyanê azadan. O wextêk xebatanê Komalanê Ciwanan ano ca. Embaz Heqî nê prosesî de netîceya qezayêkî de wextêk felç maneno la bi waştişê azadîye o heqê ney ra zî yeno. Embaz Heqî Komalanê Ciwanan ra derbazê karanê leşkerîyan beno. O kede dano viraştişê tunelanê şerî. Embaz Heqî dima tewrê Hêzanê Taybetan beno. O pê keda xo beno mazharê heskerdiş û hûrmetê embazanê xo. Embaz Heqî dima waştişê xo ser o Warê Xoverdayîşî yê Girê Cûdîyî de wezîfe gêno. Embaz Heqî 25ê teşrîna peyêne de pa embazanê xo operasyonê şorişgêrî de bi terzê fedayî şino dişmenî ser o û beno şehîd. Ma do têkoşînê ey rê dewam bikerê û bibê layîqê ci.
Embaze Eyleme Amed de dadîya xo ra bena. Embaze Eyleme verî xebatanê ciwanan de cagêna. A wexto ke Zanîngehê Dicle yê Amedî de wendêne serê rayîrê apê xo yê şehîdî Saît Polatî de şina û 2013 de Amed de bena gerîla. A Amed de perwerde vînena, Garê û Qendîl de têkoşîn kena. Embaze Eyleme serê xeta PKK û PAJKî de şina û bena wayîra tewirêkê qetî û tûjî. Embze Eyleme dima tewra Hêzanê Taybetan bena û xeta fedayîyan teqîb kena. Embaze Eyleme Warê Xoverdayîşî yê Girê FMyî de serkêşîya xoverdayîşî kena, şina serê dişmenî û rayîr nêdana ci. A dima tewra Hemleya Şorişgêre ya Şehîd Savaş Maraşî ya Cengê Xabûrî bena û bi fedayîtî şer kena. Embaze Eyleme alaya têkoşînî ya Bêrîtane, Zîlane, Sara û Rûkene berz kena. Têkoşînê aye do verê ma roşnî bikera.
Ma sere de keyeyanê înan ê ercîyayeyan rê pêro şarê welatperwerî yê Kurdistanî rê serweşîye wazenê.” BEHDÎNAN
