Merkezê Îrtîbatî û Çapemenîye yê HPGyî bi eşkerayîyêke nasnameyê di gerîlayanê şehîdan pare kerdî. Eşkerayîye wina ya:
“24ê gulana 2022yî de nêzdîyê dewa Kulluyî ya Osmanîye de pêkewtişê vera dewleta tirke ya qikere de fermandaranê ma yê ercîyayeyan Egîd Rojhilat û Armanç Nesîmîyî heta nefesê xo yê peyênî bi îrade û qerardarîyêka pîle şer kerd û şehîd bîyî. Embazanê ma Egîd û Armançî bi serran warê Amanosî de têkoşîn kerd û bîyî nimûneyanê tewr rindan ê milîtanîya Apogîran ra yew. Embazanê ma Egîd û Armançî pê îdî û qerardarîyêka pîle rixmê şertanê zoran zî erkê xo yê milîtanîye bi layîqî ardî ca.
Embazanê ma Egîd û Armançî seba ke taktîkanê gerîlatîya Modernîteya Demokratîke bikerê terzî kedêka pîle daye, fermandarîya dewrê neweyî şexsê xo de mojnaye û bi hawayêkê xurtî pratîze kerde.
Sere de keyeyanê înan ê ercîyayeyan rê ma pêro şarê welatperwerî yê Kurdistanî rê serweşîye wazenê.
Nasnameyê embazanê ma yê şehîdan wina yê:
Nameyê Qodî: Egîd Rojhilat
Name û Peyname: Hekîm Bedrî
Cayê Bîyayîşî: Kotol
Maye-Pî: Gulîzare– Gorgîn
Tarîx û Cayê Şehadetî: 24ê Gulana 2022yî / Amanos
Nameyê Qodî: Armanç Nesîmî
Name û Peyname: Beraat Boztemir
Cayê Bîyayîşî: Semsûr
Maye-Pî: Emîne – Memet
Tarîx û Cayê Şehadetî: 24ê Gulana 2022yî / Amanos
Embazê ma Egîd şaristanê Kotolî yê Rojhelatê Kurdistanî de dadîya xo ra beno. Embaz Egîd ciwanîya xo de cigêrayîşan ra dima PKKyî şinasneno. O 1996 de Kelareşî de tewrê gerîlayan beno. Embaz Egîd gerîlayanê verênan ê rojhelatijan ê PKKyî ra yew beno. Embaz Egîd Kelareşî ra verê xo dano Wan-Elbakî û tîya de gerîlatîye pratîze keno. O Zagrosan de waranê Herkî, Oremar, Gever, Şemzînan, Cîlo, Çarçella û Avaşînî de têkoşîn keno. O mîyanê Hêzanê Taybetan de cagêno. O tim xo rê felsefeya Rayberîye esas keno û Garê, Qendîl û Zap de têkoşîn keno.
Embaz Egîd 2005 de sey fermandarêkî derbazê koyanê Amanosan beno û koyanê Nûrhak û Engîzekan de zî têkoşîn keno. Dima agêreno Herêmanê Pawitişî yê Medya û Akademîya Mahsum Korkmazî û Ocaxê PKKyî de perwerde vîneno. Dima o reyna agêreno Amanosan. Embaz Egîd pê cuya xo ya derwîşane û çêrîya xo ya şerî ters fîneno zerrîya dişmenî û heta şehadetê xo zî mîyanê têkoşînêkê xurtî de cagêno.
Embaz Armanç Semsûr de mîyanê keyeyêkê elewî û welatperwerî de cagêno. Embaz Armanç cigêrayîşan ra dima partîya ma şinasneno û 2011 de Amed de tewrê gerîlayan beno. O dima panc serran Amed de maneno û tewrê xebatan beno. Embaz Armanç xeta Apogîre xo rê keno esas û na xete ser de gerîlatîye keno. 2015 de o Akademîya Hakî Karerî de perwerde gêno, hetêkî ra zî gerîlayanê neweyan sey fermandarêkê ciwanî perwerde keno. Dima mîyanê Hêzanê Taybetan de cagêno. Embaz Armanç bi xeyalanê pîlan derbazê Amanosan beno.
O bi qerardarî û îdîayêka pîle peyê xeyalanê xo de şino. Embaz Armanç eyaletê Amanosan de gerîlatîyêka profesyonele keno, azadîya şaran keno esas. O têkoşînê xo bi qerardarî, îrade û bi çêrî pê şehadetê xo tacîdar keno û beno fermandaranê tewr rindan ê partîya ma ra yew.” BEHDÎNAN
