HRE’yê bi daxuyaniyekê ragihand ku hêzên wan li Efrîn û Ezazê rêzeçalakî pêk anîn. HRE’yê da zanîn ku di çalakiyan de 6 çete û leşkerên tirk hatine kuştin
Çalakiyên şervanên Hêzên Rizgariya Efrînê (HRE) yên li dijî hêzên artêşa tirk û komên çete yên girêdayî wê yên li Efrîn û herêmên li derdora wê berdewamin. HRE’yê têkildarî şer û pevçûnên dawî daxuyaniyeke nivîskî weşand. HRE’yê da zanîn ku hêzên wan li Efrîn û Ezazê rêzeçalakî pêk anîn.
Di daxuyaniyê de HRE’yê destnîşan kir ku hêzên wan di 30’ê îlonê de li nêzî gundê Kefer Xaşir ê Ezazî li dijî komên çete çalakiya sekvaniyê pêk anî û di çalakiyê de çeteyek hatiye kuştin. HRE’yê ragihand ku hêzên wan di 1’ê cotmehê de jî li dijî 2 baregehên artêşa tirk ên li gundê Basil ê Şêrawa ya Efrînê çalakî pêk anî. HRE’yê diyar kir ku di çalakiyê de her du baregeh hatin rûxandin, 2 leşker hatin kuştin û 3 leşker jî birîndar bûn.
Topbarankirina qadên sivîlan
Daxuyaniya HRE’yê wiha bi dawî bû: “Di 1’ê cotmehê de hêzên me li dijî komeke çete ya li gundê Enabkê ya Şerayê çalakî pêk anî û di çalakiyê de 3 çete hatin kuştin. Di heman rojê de hêzên me li navenda Efrînê jî çalakiyeke sabotajê pêk anî lê encamên çalakiyê nehatin zanîn. Di navbera 29’ê îlonê û 1’ê cotmehê de artêşa tirk û çeteyên wê bi tank û obusan êrîşî qadên sivîlan ên gundên Aqîbê û Benê yên Şêrawayê, gundên Şêx Hîlal û Kefer Naya yên Şehbayê û derdora bajarokê Arfad (Til Rifat) kirin. Di topbaranê de ziyanên madî çêbûn.” EFRÎN
