HRE’yê bi daxuyaniyekê bîlançoya mehên tebax û îlonê ya êrîşên artêşa tirk û çeteyên wê yên li ser Efrîn û Şehbayê parve kir. HRE’yê da zanîn ku dewleta tirk di van mehan de 76 caran êrîşî qadên sivîlan kir
Hêzên Rizgariya Efrînê (HRE) bi daxuyaniyeke nivîskî encama êrîşên dewleta tirk û komên çete yên girêdayî wê yên di 2 mehên dawî de bi raya giştî re parve kir.
HRE’yê da zanîn ku hêzên artêşa tirk û komên çete yên girêdayî wê ji 20’ê çileya 2018’an ve qirkirina li ser gelê Efrîn û Şehbayê didomîne. HRE’yê diyar kir ku hemû cîhan li dijî vê hovîtiyê bêdeng e û hêzên dagirker van binpêkirinên xwe her ku diçe zêdetir dikin û jiyana bi hezaran welatiyan di xetereyê de ye. HRE’yê destnîşan kir ku dewleta tirk rojane zagonên şer binpê dike û qadên sivîlan ên li Efrîn û Şehbayê hedef digire. HRE’yê daxuyand ku di mehên tebax û îlonê de jî êrîşên artêşa tirk û çeteyên wê yên li dijî sivîlan dom kirin.
Li gorî daxuyaniya HRE’yê bîlanoçoya êrîşên 2 mehan wiha ne:
* Artêşa tirk û çeteyên wê gundên Merenaz, Malikiyê, Şewarxa, Kela Şewarxayê, Minix, Elqemiyê û Eyn Deqnê yê Şera ya Efrînê, gundên Soxanekê, Aqîbê, Meyasê, Başemrê, Birc Qas, Bênê û Gundê Mezin ên Şêrawa ya Efrînê, gundên Herbil, Semûqa, Bêlûniyê, Şe’alê, Til Zîwan, Til Cîcan, Nêrebiyê, Til Medîq, Şêx îsa Şêx Hîlal û bajarokê Arfadê (Til Rifet) yên herêma Şehbayê topbaran kirin.
* Artêşa tirk 6 jê bi balafirên bêmirov, bi giştî 76 êrîş pêk anîn.
* Di van êrîşan de hezar û 868 guleyên obus, tank û hewanan û bi hezaran guleyên doçkayan hatin bikaranîn.
* Di encama van êrîşan de 9 sivîl birîndar bûn. Her wiha ziyanên mezin gihiştin mal û milkê welatiyan û bandor li ser debara welatiyan kir.”
Herî dawî jî HRE’yê soz da gel ku dê tu êrîşên artêşa tirk û çeteyên wê bêbersiv nehêlin û heta ku Efrînê rizgar dikin û gelê wê lê vedigerînin jî dê têbikoşin.
