HRE’yê bi daxuyaniyekê bîlançoya şer û pevçûnên di navbera hêzên wan û hêzên dagirker ên artêşa tirk û çeteyên wê aşkera kir. HRE’yê da zanîn ku di encama şer de yek jê serpel û yek jî serdar herî kêm 40 leşker û çete hatine kuştin
Hêzên artêşa tirk a dagirker û komên çete yên girêdayî wê duh bi alîkariya balafirên şer û çekên giran êrîşî xeta gundên Malîkiye û Merenaz ên Şera ya Efrînê kir. Li ser vê yekê di navbera şervanên Hêzên Rizgariya Efrînê (HRE) û komên dagirker de şerekî dijwar rû da. Têkildarî bîlançoya şer û pevçûnan, HRE’yê daxuyaniyeke nivîskî weşand.
Di daxuyaniyê de HRE’yê diyar kir ku di 4’ê gulanê de, artêşa tirk û çeteyên wê topbarana xwe ya li ser herêm û gundên tijî sivîl ên li navçeya Şera û Şêrawa yên Efrînê û heremên Şehbayê zêde kirin. HRE’yê daxuyand ku hêzên dagirker dibin siya topbaran û balafirên keşfê de û bi tevlêbûna bi hezaran leşker û çeteyan dest bi operasyoneke bejahî kir.
Ketin kêmîna şervanan
HRE’yê daxuyand ku hêzên wan jî destwerdana rewşê kir û ev agahî dan: “Di navbera hêzên me û hêzên dagirker de li seranserî xeta gundên Malikiyê û Merenazê şerên sing bi sing qewimîn. Şer zêdetirî 12 saetan dom kir. Di encamê de 3 hewldanên artêşa tirk a dagirker û çeteyên wê vala hatin derxistin û dagirkeran derbên giran xwarin. Artêşa tirk a dagirker ku derbên giran xwarin, gelek leşker û çekên giran şandin heremê. Komeke leşkeran ku ji baregehên xwe yên li gundê Meryemîn ê Şerayê derket, ket kemîna tîmeke taybet a hêzên me. Di encamê de 2 jê fermandarên tirk ku ji yek jê serpel û yek jî jê serdar, bi giştî 4 leşker hatin kuştin û 3 jî birîndar bûn. Gelek wesayîtên wan jî hatin derbkirin.”
Herêmên sivîlan tên topbarankirin
Daxuyaniya HRE’yê wiha bi dawî bû: “Di encama şer û pevçûnan de bi giştî herî kêm 40 leşker û çete hatin kuştin û zêdetirî 30’an jî birîndar bûn. Êrîşa artêşa dagirker û çeteyên wê hate pûçkirin. Artêşa dagirker ji bo ku windahiyên xwe veşêre, topbarana xwe ya hovane ya li ser herêmên sivîlan didomîne. Seranserî rojê, zêdetirî 25 gundên Şera, Şêrawa û heremên Şehbayê hatin topbarankirin. Gelek ziyanên madî gihîştin mal û milkên sivîlan.” ŞEHBA
