HRE’yê bi daxuyaniyekê ragihand ku hêzên wan li Ezaz û Efrînê li dijî hêzên artêşa tirk a dagirker û çeteyên wê çalakî pêk anîn û di encamê de 6 çete hatin kuştin û 2 leşkerên tirk jî birîndar bûn
Çalakiyên şervanên Hêzên Rizgariya Efrînê (HRE) yên li dijî hêzên dagirker ên li Efrîn û herêmên derdora wê didomin. Di vê çarçoveyê de HRE’yê daxuyaniyek da û da zanîn ku li herêmên Efrîn û Ezazê di 17 û 18’ê çileyê de li dijî artêşa tirk a dagirker û komên wê yên çete çalakiyên xurt pêk anîne.
HRE’yê diyar kir ku hêzên wan di 17’ê çileyê de li Ezazê li baregeheke artêşa tirk a dagirker xist û di encamê de 2 leşker birîndar bûn. Di heman demê de HRE’yê destnîşan kir ku hêzên wan di şeva 17’ê çileyê û di sibeha 18’ê çileyê de li derdora gundê Beradê yê Şêrawa ya Efrînê 2 çalakiyên sabotajê pêk anîn û di encamê de 6 çeteyên Firqat Hemzet hatine kuştin.
Topbarankirina herêmê
Herî dawî jî HRE’yê ev agahî dan: “Her wiha di 17 û 18’ê çileyê de artêşa tirk a dagirker gelek gundên herêmên Efrîn û Şehbayê bi obusan bombebaran kirin. Li ser herêmê hîn jî tevgera balafirên keşfê berdewam dike.”
