HRE’ê daxuyand ku di rêzeçakiyên wan ên dawîn ên li Efrîn û Ezazê de 7 leşker û çeteyên artêşa tirk hatine kuştin û 10 jî birîndar bûne
Hêzên Rizgariya Efrînê (HRE) bi daxuyaniyeke nivîskî têkildarî çalakiyên hêzên xwe agahiyan parve kir.
HRE’yê destnîşan kir ku yekîneyên wan di 8 û 9 Hezîranê de li Efrîn û Ezazê li dijî leşker û çeteyên artêşa tirk a dagirker rêzeçalakî li dar xistine û ev agahî parve kir: “Hêzên me bi rêzeçalakiyan li herêma Efrîn û Ezazê leşker û çeteyên dewleta dagirker a tirk kirin armanc û herî kêm 7 leşker û çete kuştin. Di 8’ê hezîranê de yekîneyek me êrîş bir ser baragehekî çeteyên Ehrar El Şam li gundê Ebla yê girêdayî herêma Ezazê. Di encamê de şer di navbera şervanên me û çeteyan de rû da û çeteyê bi navê Mihemed El-Xetîb hat kuştin û 3 çete jî birîndar bûn.
Di 9’ê hezîranê de hêzên me çalakiyeke bi bandor li hember baregehekî artêşa tirk a dagirker a li gundê Meryemînê li navçeya Şera li dar xist û di encamê de 2 leşkerên tirk hatin kuştin û 5 leşker jî birîndar bûn.
Dîsa di heman de rojê hêzên me baregehekî çeteyên Cebha El Şamiye ya li gundê Vêlat El Qadî a li navçeya Şera bi çalakiyekî hedef girtin, di çalakiyê de 4 çeteyên koma navborî hatin kuştin û 3 jî birîndar bûn.
Her wiha dîsa di heman rojê de hêzên me seyareyek leşkerî ku sotemenî ji bo baragehên çeteyan ên li gundê Meryemînê li navçeya Şera vediguhest, hedef girtin. Di encamê de seyareya leşkerî hat rûxandin lê der barê kuştî û birîndarên çeteyan de agahî bi dest neketin.
Di encama rêzeçalakiyên hêzên me de herî kêm 7 leşker û çeteyên dewleta dagirker a tirk hatin kuştin û 10 jî birîndar bûn.”
