HRE’yê bi daxuyaniyekê ragihand ku hêzên wan li Efrînê gelek çalakî pêk anîne. HRE’yê diyar kir ku di çalakiyan de 7 çete hatine kuştin
Şervanên Hêzên Rizgariya Efrînê (HRE) li Efrînê li dijî hêzên artêşa tirk û komên çete yên girêdayî wê çalakiyên bi bandor pêk anîn. Têkildarî mijarê HRE’yê daxuyaniyeke nivîskî weşand.
HRE’yê da zanîn ku hêzên wan di 27’ê îlonê de li derdora gundê Ebnakê yê Şera ya Efrînê li dijî komên çete çalakiya sekvaniyê pêk anîn û çeteyek hate kuştin. HRE’yê daxuyand ku di 28’ê îlonê de jî hêzên wan li herêma di navbera gundê Kefer Nebo û Birc Heyder li dijî navend û çeperên çeteyan çalakî pêk anî û pevçûn 15 deqeyan dom kir. HRE’yê da zanîn ku di çalakiyê de 3 çete hatin kuştin, 2 çete birîndar bûn û 2 wesayîtên leşkerî jî hatin derbkirin.
Di berdewamê de jî HRE’yê ragihand ku hêzên wan di 28’ê îlonê de li herêma di navbera gundê Berad û Kefer Nebo yê Şêrawayê de çalakiyeke bibandor li dijî baregeheke çeteyan pêk anî. HRE’yê diyar kir ku di çalakiyê de baregeh hate rûxandin û 2 çete hatin kuştin. HRE’yê destnîşan kir ku di çalakiya sekvaniyê ya li gundê Mezin jî çeteyek hate kuştin.
Topbarankirina herêmê
Daxuyaniya HRE’yê wiha bi dawî bû: “Di navbera 26-28’ê îlonê de artêşa tirk û çeteyên wê bi çekên hewan û obusan top li gundên sivîlan ên Semûqa û Til Medîq ên Şehbayê û Bendava Şehbayê barandin. Di êrîşê de ziyanên madî çêbûn.” EFRÎN
