HRE’yê diyar kir ku hêzên wan li dijî komkujiya ku dewleta tirk a li Til Rifatê pêk anî, rêzeçalakî pêk anîne. HRE’yê diyar kir ku di van çalakiyan de 7 çete û leşkerên tirk hatine kuştin
Hêzên Rizgariya Efrînê (HRE) bi daxuyaniyekê ragihandin ku hêzên wan li dijî komkujiya ku hêzên artêşa tirk a dagirker û çeteyên wê li Til Rifatê li dijî sivîlan pêk anîn, çalakiyên tolhildanê kirin.
HRE’yê da zanîn ku hêzên wan di 3’yê kanûnê de li gundê Gobelê yê Efrînê li dijî baregeheke leşkerî ya artêşa tirk a dagirker çalakî pêk anîn û wiha domand: “Di çalakiyê de bataryayeke obusê hate rûxandin û leşkerekî tirk ê dagirker hate kuştin. 2 leşker jî birîndar bûn. Di heman rojê de hêzên me li derdora Ezazê li dijî çeper û stargehên çeteyên artêşa tirk çalakî pêk anî. Di çalakiyê de 5 dagirker hatin kuştin û gelek jî birîndar bûn.”
Bi berdewamî jî HRE’yê daxuyand ku hêzên wan di heman rojê de li derdora Mareyê li dijî çeteyên artêşa tirk a dagirker çalakiya sûîqestê pêk anîn û çeteyek hatiye kuştin. Daxuyanî wiha bi dawî bû: “Piştî çalakiyên hêzên me, artêşa tirk a dagirker û çeteyên wê qadên sivîlan ên li gundên Soxanekê û Aqîbê yên Şêrawa, gundên Şewarxa, Elqamiyê û Malikiyê yên Şerayê û gundê Hirbil ê Şehbayê topbaran kirin. Em weke HRE’yê careke din dibêjin ku dê tu êrîş bêbersiv neyên hiştin.”
