HRE’yê bi daxuyaniyekê da zanîn ku hêzên wan li navçeya Cindirêsê wesayîta serçeteyekê Ehrar El Şamê hedef girtiye. HRE’yê diyar kir ku di çalakiyê de çeteyek hatiye kuştin û yek jî bi giranî birîndar bûye
Şervanên Hêzên Rizgariya Efrînê (HRE) hem li Efrîn û navçeyên wê û hem jî li gelek herêmên weke Ezaz, Bab, Mare û hwd. li dijî hêzên dagirker çalakiyên cur bi cur pêk tînin. Ji ber çalakiyên şervanan, hêzên dagirker heta niha gelek derb xwarine. HRE’yê niha jî bi daxuyaniyeke nivîskî ragihand ku hêzên wan li Cindirêsê li koma çete ya Ehrar El Şamê dane.
Daxuyaniya HRE’yê ya têkildarî çalakiyê wiha ye: “Hêzên me di 9’ê tîrmehê de li navenda navçeya Cindirês a Efrînê, wesayîteke leşkerî ya serçeteyekê koma Ehrar El Şamê hedef girt. Di çalakiya sabotajê de çeteyê bi navê Ebû Hesan Sufyan hate kuştin û çeteyek jî bi giranî birîndar bû. Wesayîta leşkerî jî derb xwar.” EFRÎN
