HSD’ê bi daxuyaniyekê bîlançoya şer û pevçûnên di nava 24 saetên dawî bi raya giştî re parve kir. HSD’ê destnîşan kir ku di encama şer û pevçûnên giran de herî kêm 32 çete hatin kuştin û gelek çete jî birîndar bûn
Navenda Ragihandin û Çapemeniyê ya Hêzên Sûriyeya Demokratîk (HSD) têkildarî bîlançoya şer û pevçûnên di nava 24 saetên dawî yên li gundê Baxoz ê Hecîn a Dêrazorê daxuyaniyeke nivîskî weşand. Di daxuyaniyê de hat destnîşankirin ku di nava 24 saetên dawî de 4 jê serçete bi giştî 32 çeteyên DAIŞ’ê hatine kuştin.
Di daxuyaniya HSD’ê de hat diyarkirin ku şervanên wan êrîşî kom û baregehên çeteyên DAIŞ’ê yên li Baxozê kirine û ev agahî hatin parvekirin: “Di navbera şervan û çeteyan de şer derket. Di encama şer û pevçûnan de 4 jê serçete bi giştî 32 çete hatin kuştin û gelek çete jî birîndar bûn. Her wiha şervanên me, şervanekî me yê ku beriya 2 rojan winda bûbû, dît. Şervanê me bi sivikî birîndar bû. Ji bo tedawiyê rakirin nexweşxaneyê. Di encama çalakiyên sûîqestê yên hêzên me de 2 çete hatine kuştin. Hêzên koalîsyonê jî li dijî baregehên çeteyên DAIŞ’ê 12 êrîş pêk anîn.”
Çekên hatin desteserkirin
HSD’ê da zanîn ku di encama şer û pevçûnan de hêzên wan dest danîne ser 45 kalaşnîkof, 2 BKC, 13 RBC, 3 çekên burno, çekeke Zagrosê, 2 çekên ozî, çekeke sûîqestê, guleyên çeka doçka yên 14,5 mm (8 sendoq), 4 çekên B7 û çekên nêçîrvaniyê. Her wiha di daxuyaniyê de hat gotin ku wesayîteke leşkerî ya çeteyan hatiye teqandin. DÊRAZOR
