HSD’ê bi daxuyaniyeke nivîskî ragihand ku şer û pevçûnên di navbera hêzên wan û hêzên dagirker de didomin. HSD’ê diyar kir ku di şer û pevçûnên di 22’yê cotmehê de herî kêm 50 çete û leşker hatin kuştin û 16 şervanên wan jî şehîd bûne
Navenda Ragihandina Hêzên Sûriyeya Demokratîk (HSD) têkildarî şer û pevçûnên di navbera hêzên wan û artêşa tirk a dagirker û çeteyên wê yên di 22’yê cotmehê daxuyaniyeke nivîskî weşand. Di daxuyaniyê de HSD’ê diyar kir ku artêşa tirk a dagirker û çeteyên wê ji 22’yê cotmehê ve êrîşên xwe domandine.
Daxuyaniya HSD’ê wiha ye:
“SERÊKANIYÊ
* Komên çete xwestin bi seyareyên zirxî xwe nêzî çeperên şervanên me bikin. Hêzên me bi armanca parastinê bersiv dan vê tevgerê û çeteyek hate kuştin.
DÊRIK
* Balafirên keşfê û yên şer yên artêşa dagirker li ser herêmê geriyan. Artêşa dagirker di 22’yê cotmehê de li ser xeta sînor liv û tevgera xwe bi seyareyên sîvîl domand.
* Di 22’yê cotmehê seet di 09.00’an serê sibehê de hejmareke zêde ya komên çete, wesayîtên zirxî, çekên giran û bi piştgiriya balafirên bê mirov xwestin êrîşî gundê Celbê bikin. Hêzên me bersiv dan êrîşan û şer heta saet 12’an dom kir. Di şer de gelek kuştî û birîndarên dijmin çêbûn. Pevçûn di danê êvarê de jî li derdora gund dom kir. Di encama pevçûnan de herî kêm 50 çeteyên artêşa tirk hatin kuştin û wesayîteke zirxî jî hat rûxandin.
* Her wiha hevalê me Sebrî di encama pevçûnên li gundê Celbê de bi awayekî lehengî heya guleya dawî şer kir û şehîd bû. Heval Sebrî ku di encama birîndariya hevalên xwe de di dorpêçê çeteyan de ma. Ji bo ku nekeve destê dijmin, bi bombeya xwe çalakiyeke fedaî pêk anî û şehîd bû. Em ê agahiyên nasnameya rêheval Sebrî pişt re bi raya giştî re parve bikin.
* Di vê berxwedanê de bi giştî de 16 rêhevalên me şehîd bûn û 13 hevalên me jî birîndar bûn.”
