HSD’ê bi daxuyaniyekê ragihand ku hêzên wan di roja 28’emîn a Berxwedana Rûmetê de derbên giran li dagirkeran dan. HSD’ê diyar kir ku di 24 saetên dawî de 27 çete û leşkerên tirk hatin kuştin û 14 şervanên wan jî şehîd bûn
Navenda Ragihandinê ya Hêzên Sûriyeya Demokratîk (HSD) têkildarî şer û pevçûnên di navbera hêzên wan û hêzên dagirker ên dewleta tirk û çeteyên wê yên di 24 saetên dawî daxuyaniyeke nivîskî bi raya giştî re parve kir.
Daxuyaniya HSD’ê wiha ye:
“TIL TEMIR
* Artêşa tirk a dagirker û komên çete yên girêdayî wê êrîşên xwe yên bi çekên giran û êrîşên hewayî yên li ser gundewarên Til Temirê domandin. Artêşa tirk a dagirker bi dehan caran gundên Menacîr, Ehras û Erîşayê bi balafirên bêmirov hedef girt û êrîşên bejahî pêk anîn. Hêzên me di çarçoveya parastina rewa de bi awayeke tund bersiva êrîşan dan û li gundên Ehras û Menacîr komên çete kirin hedef. Di encamê de herî kêm 12 çete hatin kuştin.
ZIRGAN
* Hêzên me di çarçoveya mafê xweparastinê de bersivên tund dan dagirkerên ku êrîşî gundên Xeşîm Zirgan, Ing El Hewa û Til Hemîdê kirin. Di encama şer de herî kêm 9 çete hatin kuştin. Dîsa li vê herêmê tangeke dagirkeran hate rûxandin û BMP’yek hate derbkirin.
EYN ÎSA
* Artêşa tirk a dagirker bi obus û tangan gundên Qenterî û Şêrdiradê topbaran kir. Hêzên me bersiva van êrîşan dan. Komên çete piştî nîvro êrîşî herêma El Nasiriyê kir. Li vê herêmê di navbera hêzên me û komên çete de şerên giran qewimîn. Di encama van şeran de 6 çete hatin kuştin.
* Di şerê roja 28’emîn de bi giştî herî kêm 27 çete hatin kuştin, tangek û seyareyeke leşkerî hatin rûxandin û BMP’yek jî hate derbkirin.
* Di vê berxwedanê de 14 hevalên me jî şehîd bûn û 13 hevalên me jî birîndar bûn.”
