HSD’ê bi daxuyaniyekê ragihand ku dewleta tirk li gorî agirbestê tevnagere û êrîşên xwe didomîne. HSD’ê da zanîn ku ji rewşa agirbestê Pence û Pompeo berpirsyarin û bang kir ku fişarê li dewleta tirk bikin da ku destûrê bide ji bo Serêkaniyê korîdora mirovî bê vekirin
Fermandariya Giştî ya Hêzên Sûriyeya Demokratîk (HSD) têkildarî agirbestê û binpêkirina wê ya ji hêla dewleta tirk û çeteyên wê ve daxuyaniyeke nivîskî bi raya giştî re parve kir.
HSD’ê diyar kir ku hêzên wan agirbesta ku di navbera hêzên wan û dewleta tirk a bi navbeynkariya DYA’yê re hatiye ragihandin, qebûl kiriye. HSD’ê da zanîn agirbestê ji saet 22:00’an ve dest pê kir û wiha domand: “Lê Tirkiyeyê hê jî êrîşên xwe nesekinandine û agirbestê binpê dike. Tevî ku 30 saet bi ser agirbestê re derbas bûn jî, heta niha jî nehêlaye ku ji bo rizgarkirina sivîlên li Serêkaniyê û sivîlên birîndar korîdoreke mirovî bê vekirin.”
Banga li DYA’yê kir
Bi berdewamî jî HSD’ê destnîşan kir ku cîgirê serokê Amerîkayê Mike Pence û wezîrê karên derve Mike Pompeo ji agirbestê û vekirina korîdora mirovî berpirsyarin û wiha bi dawî kir: “Tevî têkiliya bênavber a bi aliyê Amerîkayê re û sozên ku dane da ku vê pirsgirêkê çareser bikin, heta vê saetê jî tu pêşketinên cidî nînin. Me soza pêkanîna agirbestê da û hê jî li gorî wê tevdigerin. Lê belê di heman demê de ji DYA’yê dixwazin ku li gorî peymanê tev bigerin û zextê li dewleta tirk bikin da ku korîdoreke mirovî vekin ku birîndar û sivîlan ji Serêkaniyê ya dorpêçkirî rizgar bikin.”
