HSD’ê bi daxuyaniyekê bîlançoya roja 34’emîn a Berxwedana Rûmetê aşkera kir. HSD’ê diyar kir ku di şer û pevçûnan de herî kêm 15 çete û leşkerên tirk hatine kuştin û hejmareke zêde jî hatine birîndarkirin
Navenda Ragihandin û Çapemeniyê ya Hêzên Sûriyeya Demokratîk (HSD) encamên şer û pevçûnên roja 34’emîn a Berxwedana Rûmetê bi raya giştî re parve kir. Di daxuyaniyê de HSD’ê destnîşan kir ku artêşa tirk a dagirker û çeteyên girêdayî wê tevgera xwe ya dagirkeriyê berfirehtir kir û êrîşên xwe yên bejahî û hewayî domandin.
Daxuyaniya HSD’ê wiha dom kir:
“ZIRGAN
* Artêşa tirk a dagirker û çeteyên wê bi piştgiriya tank, top û balafirên keşfê êrîşî gundên Til Mihemed, Um İşbe û Bab El Xêr kir.
TIL TEMIR
* Artêşa tirk a dagirker û çeteyên wê bi çekên giran û bi piştgiriya balafirên keşfê bi dijwarî êrîşî gundên Menax û Reşediyeyê kir. Li ser vê yekê jî hêzên me yên Meclisa Leşkerî ya Suryan bersivên tund dan û hejmareke leşkerên artêşa tirk a dagirker hatin kuştin û birîndarkirin. Lê hejmar nehat zelalkirin.
* Her wiha di encama topbarana artêşa tirk a dagirker a li Serêkaniyê de guleyekê obusê ya dagirkeran di nava wan de teqiya û di encama de 8 leşker û çete hatin kuştin.
EYN ÎSA
* Artêşa tirk a dagirker bi çekên giran, tank, top û balafirên keşfê êrîşî gundên Mişêrfa, Silîp, depoyên genim ên Qiz Elî, Şergirakê û Rêya M4’ê kir. Di encama bersivdayîna hêzên me de herî kêm 7 çete û leşker hatin kuştin û gelek ji wan jî birîndar bûn.
* Her wiha artêşa tirk a dagirker li gundê Qirinfilê bi balafirên keşfê li seyareyekê sivîlan xist. Di encamê de 2 sivîlan jiyana xwe ji dest da û 3 jî birîndar bûn.
* Bi giştî di encama şer û pevçûnan û di teqîna bi guleya obusê de 15 çete û leşkerên artêşa tirk a dagirker hatin kuştin û hejmareke mezin jî birîndar bûn.
* Di êrîşên hewayî yên artêşa tirk a dagirker de jî 2 hevalên me û 2 sivîl şehîd bûn û 4 hevalên me û 3 sivîl jî birîndar bûn.”
