HSD’ê bi daxuyaniyekê ragihand ku liv û tevgera dagirkeriyê yên dewleta tirk û çeteyên wê yên li seranserî herêmê didomin. HSD’ê diyar kir ku hêzên dagirkeran qadên sivîlan hedef girtin û di êrîşan de şervanekê wan şehîd bûye
Navenda Ragihandin û Çapemeniyê ya Hêzên Sûriyeya Demokratîk (HSD) têkildarî encamên şer û berxwedana 24 saetên dawî bi daxuyaniyeke nivîskî parve kir. Di daxuyaniyê de HSD’ê diyar kir ku artêşa tirk a dagirker û çeteyên wê di rojên 62 û 63’yemîn ên êrîşên de jî li seranserê herêmê liv û tevgera xwe domand. HSD’ê ragihand ku hêzên dagirker li gelek qadan tevgera balafirên bêmirov domand û cih bi cih jî herêmên sîvîl bi dijwarî tên topbarankirin.
Daxuyanî wiha dom kir:
“TIL TEMIR
* Artêşa tirk a dagirker di her du rojan de bi sedan çeteyên xwe anîn herêmê û dest bi amadekariya êrîşên nû kir. Artêşa tirk a dagirker derdora gundê Um El Kêf topbaran kir. Di encama topbaranê de ziyanên madî gihîştin milkên sîvîlan. Artêşa dagirker her wiha bi balafirên bêmirov û çekên giran herêma gundê Til El Werid bombebaran kir.
EYN ÎSA
* Artêşa tirk a dagirker bi çekên giran êrîşî qadên sivîlan ên li gundên Kendal û Çelebê yên girêdayî herêma Qizelî kir. Her wiha malên gundiyan ên li gundên Erîda û Xirbet Faris rasterast ji aliyê artêşa dagirker ve hatin hedefgirtin.
* Di encama êrîşên artêşa dagirker ên bi balafirên bêmirov de hevalekî me şehîd bû.”
