Şervanên HSD’ê şevê din ji bo rizgarkirina gundê dawî yê di destê DAIŞ’ê de dest bi operasyonê kir. Hat zanîn ku şervan 2 km’yan pêş ketin û şerekî dijwar li herêmê diqewime
Şervanên Hêzên Sûriyeya Demokratîk (HSD) di çarçoveya qonaxa Şerê Tunekirinê Terorê ya Pêngava Bagera Cizîrê de, navçeya Hecînê û gelemperiya gundewarên wê ji koma çete ya DAIŞ’ê rizgar kir. Şervanan şevê din jî ji bo rizgarkirina herêma Baxozê ya li başûrê rojhilatê Hecînê, operasyona dawî da destpêkirin.
Hat zanîn ku di çarçoveya operasyona dawî de di navbera şervanên HSD’ê û çeteyên DAIŞ’ê de şerê dijwar rû dide. Li gorî agahiyên ji herêmê, di encama şer û pevçûnên giran de şervanên HSD’ê bi qasî 2 kîlometreyan pêş de çûn û berxwedan didome.
Têkildarî mijarê fermandarên HSD’ê agahî dan û diyar kirin ku li herêmê tenê qadeke biqasî 3 kîlometreçargoşe di destê çeteyên DAIŞ’ê de maye. Şerê li herêmê bi hemû dijwariya xwe berdewam dike.
Serweriya DAIŞ’ê bi dawî dibe
Hêjayî bibîrxistinê ye ku şervanên HSD’ê piştî ku 20 hezar sivîlên di destê çeteyên DAIŞ’ê de rizgar kirin, dest bi operasyona li Baxozê kir. Bi serkeftina vê operasyonê re jî êdî serweriya DAIŞ’ê ya li ser rûyê erdê bi dawî dibe. DÊRAZOR
