HSD’ê bi daxuyaniyeke ragihand ku Rûsya erka xwe ya garantoriya agirbestê pêk nayîne. HSD’ê diyar kir ku dewleta tirk û çeteyên wê li ber çavê hêzên rûs êrîşî herêmên wan dikin lê Rûsya xwe li bêdengiyê datîne
Navenda Ragihandin û Çapemeniyê ya Hêzên Sûriyeya Demokratîk (HSD) têkildarî êrîşên dewleta tirk û çeteyên wê yên li dijî herêmê û bêdengiya dewleta rûs a li dijî van êrîşan, daxuyaniyeke nivîskî bi raya giştî re parve kir.
Daxuyaniya HSD’ê ya têkildarî mijarê wiha ye:
“Artêşa dewleta tirk û komên girêdayî wê yên bi navê Artêşa El Wetenî, ji sê aliyan li dijî bajarokê Eyn Îsayê êrîşeke dijwar pêk tînin. Li hêlekê herêmê topbaran dikin û li hêla din jî bi piştgiriya balafirên şer êrîşî herêmê dikin. Li hemberê van êrîşan jî hêzên me li ber xw didin û li derdora Eyn Îsayê şerekî dijwar heye.
Ev êrîş li pêş çavên hêzên Rûsyayê pêk hatin. Lê ji bo pêşîlêgirtina van êrîşan tu hewldanên wan çênebûn. Tevî ku garantorên agirbestê ne jî ji bo sekinandina êrîşan erka xwe bi cih ne anî.
Guhnedayîna hêzên Rûsyayê ya li hemberî van êrîşan û pêkneanîna rola xwe ya garantoriyê, gelek gumanan li gel hêzên me çêdike. Ev helwest ne li gorî rola garantor a siyasî ya ya li tevahiya Sûriyeyê ye.”
