Fermandarîya Pêroyî ya Hêzanê Sûrîyeya Demokratîke (HSD) derheqê Operasyonê Zixmkerdişê Asayîşî yo ke roja 7. de dewam keno, eşkerayîye daye. Eşkerayîya ke pelê înternetî yê fermî yê HSDyî de ameye parekerdene de nê ameyî vatene:
”Operasyonê Zixmkerdişê Asayîşî vera hucreyan û sûcdaranê DAIŞî dîya destpêkerdene. Badê operasyonî tay hêzanê teberî cehd kerd ke mudaxale bikerê û plananê xo yê leyminan bîyarê ca. Bitaybetî hîrê rojanê peyênan de mabênê HSD û Meclîsê Leşkerî yê Dêrazorî û çeteyanê çekdaran ê pabesteyê dezgehanê asayîşê hukmatê Şamî yê ke ravîyartî rojawanê awe Firatî pêkewtişî qewimîyayî.
Çeteyê ke ravîyartê xeta Salihiyê mabênê şarî de fîtne û pêkewtiş vet û wina ramojna ke pêkewtişî mabênê hêzanê HSDyî û şarê Dêrazorî de ciwîyenê. Nê îdîayî zûr ê; xora no operasyon bi waştişê şar û eşîranê Dêrazorî ame destpêkerdene. Mabênê hêzanê ma û şarê Dêrazorî de qet problemêk çîn o. Xora her kes zano ke HSDyî şarê herême zilmê DAIŞî ra xelisna, heta nika pawit û semedê asayîş îstîkrarê herême gureyeno.
Antîpropagandayê ke ameyî kerdene waştişê ci oyo senî ke mabênê hêzanê ma û eşîranê ereban de pêkewtiş est o, wina ramojnê. 2013yî ra nata tay hetî wazenê ke şerê mabenê HSD û DAIŞî sey şerê kurd-ereban ramojnê. Raştîye de mabênê şarê ereb û kurdan de problem çîn o. Laj û kênayê ereb, kurd, suryanî û armenî heme dezgehanê Îdareyê Xoserî û HSDyî de pîya têkoşîn kenê û semedê pawitişê herra ma gonîya xo rişnenê. HSD bi xo îspatê yewîya şaranê herême û bitaybetî yewîya şaranê ereb û kurdan o. Coka êyê ke yewîya ma nêwezanê wazenê na yewîye bixeripnê.
Ma hêvî kenê ke şarê ma nê kayan vîneno û pa nêxapîyeno. Dewleta tirke ya îşxalkere û çeteyanê ci no sey firsetî dî û pan hetan ra hêrişê xetanê pawitişî yê Meclîsê Leşkerî yê Minbicî kerd. Şervananê Meclîsê Leşkerî yê Minbicî bi hewayêkê qehremankî cevab da. Ma veng dnaê ke sere de şarê ma yê Dêrazorî heme şarê herême wa nê kayana mexapîyo. No şer mabênê HSD û çeteyanê dewleta tirke û çeteyanê pabesteyê dezgehanê asayîşê hukmatê Şamî de yeno kerden. Mabênê HSD û eşîranê herême de problem çîn o.”
