HSD’ê bi daxuyaniyekê ragihand ku di roja 40’emîn a êrîşên dagirkeriyê de jî hêzên artêşa tirk a dagirker û çeteyên wê erîşên xwe domandin û hewl dan herêmên nû dagir bikin
Navenda Ragihandin û Çapemeniyê ya Hêzên Sûriyeya Demokratîk (HSD) bi daxuyaniyekê encamên şer û berxwedana roja 40’emîn a li rojavayê Kurdistanê ragihand. HSD’ê diyar kir ku artêşa tirk a dagirker û çeteyên wê hewldanên xwe yên dagirkirinê berdewam kirin.
Daxuyaniya HSD’ê wiha dom kir: “Artêşa tirk a dagirker tevgera xwe ya hewayî ya li seranserê herêmên eniyê domand. Di vê çarçoveyê de balafirên keşfê yên dewleta tirk a dagirker li ser gundên asuran geriyan. Her wiha komên çete tevgera xwe ya dagirkeriyê li herêmê domand.”
HSD’ê wiha dawî li daxuyaniya xwe anî: “Artêşa tirk a dagirker piştî dewriyeyeke hevpar a bi hêzên Rûsyayê ya li Eyn Îsayê, bi çekên giran û tankan û hejmareke zêde ya çeteyan êrîşî herêmê kir û xwest herêmên nû dagir bike. Artêşa dagirker piştî dewriyeya li depoyên genim ên Şêrgirakê, careke din vegeriya û qad dagir kir û çeteyên xwe lê bi cih kirin.”
