Fermandariya Giştî ya Hêzên Sûriyeya Demokratîk (HSD) têkildarî bûyerên dawî yên li rojavayê Kurdistanê û Sûriyeyê diqewimin civînek çapemeniyê li bajarê Hesekê li dar xist. Daxuyanî bi amadebûna Fermandarê Giştî yê HSD’ê Mazlûm Ebdî û Fermandara YPJ’ê Rohilat Efrîn pêk hat.
Di destpêkê de Fermandar Mazlûm Ebdî axivî û diyar kir ku tevgereke çeteyên DAIŞê çolistana Sûriyeyê (Badiye) heye û got: “Em ji gelê xwe yê li Reqa, Tebqa û Dêrazorê re dibêjin bila dilê we rehet be; HSD amade ye tevahiya gelên herêmê biparêze. Em ji tevahiya gelê herêmê dixwazin ku li dora HSD’ê kom bibin.”
Mazlûm Ebdî da zanîn ku li Sûriyeyê geşedanên nû hene û hêzên hikumeta Şamê ji nişka ve hilweşiyane û wiha pê de çû: “Rewşa heyî ya li Sûriyeyê tevgereke bilez a ji bo parastina sivîlan û sepandina ewlehiya herêmên bakur û rojhilat neçar dike.”
Mazlûm Ebdî got: “HSD’ê ji bo rizgarkirina sivîlên li gundewarên Helebê korîdoreke mirovî vekir û bi desteka Koalîsyona Navneteweyî beşeke mezin a niştecihan ji Til Rifet û Şehbayê derxistin û hewldanên wan ên derxistina şêniyên din hene.
Mazlûm Ebdî têkildarî taxên Kurdan ên li Helebê jî diyar kir ku nêzî 250 hezar kes li Şêxmeqsûd û Eşrefiyê hene û di xetere û dorpêçê de ne û axaftina xwe wiha domand: “Hêzên me yên xwecih ên ji xelkê taxê li wir hene. Ev hêz bi qehremanî gelê me diparêzin û heya vê demê jî di çeperên xwe de parastinê dikin. Em dixwazin pirsgirêka taxên Kurdan ên li Helebê bi rêya diyalogan a di çarçoveya ku xelkê me li wir bimîne û nasnameya xwe ya kurdî biparêze û li Heleba nû de cihê xwe bigire, were çareserkirin. Hewldanên me yên ji bo çareserkirina vê yekê jî hene.”
Mazlûm Ebdî bal kişand ser gefên Tirkiyeyê yên li ser Herêma Bakur û Rojhilatê Sûriyeyê û bi taybetî kantona Minbicê û wiha got: “Li hemberî van gef û êrîşan ev 4 sal e me tedbîrên xwe girtine. Hêza me ya parastinê têrê dike. Erka me parastina herêmê me. Em dixwazin bi rêya diyalogan pirsgirêkan bi Tirkiye re çareser bikin. Ji bo tesnyon dakeve hewldanên Rûsya û Koalîsyona Navneteweyî hene.”
Mazlûm Ebdî der barê rewşa li bejahiya Reqa û Dêrazorê de jî agahî dan û diyar kir ku piştî vekişandina hêzên hikûmeta Şamê tevgerên çeteyên DAIŞ’ê li wir derketin û ev yek anî ziman: “Divê em herêmên Dêrazor, Tebqa û Reqa ji êrişên DAIŞ’ê biparêzin. Li hemberî xetereya çeteyên DAIŞ’ê li herêmê, hewldanên me bi Hêzên Koalîsyona Navneteweyî re hene.”
Mazlûm Ebdî diyar kir ku geşedanên dawîn ên li Sûriyeyê çareseriyeke siyasî ya li gorî biryara navneteweyî ya 2254’an pêwîst dike.
Mazlûm Ebdî diyar kir ku ji bo taxên Şêxmeqsûd û Eşrefiyê jî nîqaşên wan bi Heyet Tehrîr El Şam re hene û got: “Heya niha şer di navbera hêzên me û Heyet Tehrîr El Şam de çênebûye. Em dixwazin Bakur û Rojhilatê Sûriyeyê ji êrişan dûr bixin. ”
Mazlûm Ebdî da zanîn ku têkildarî geşdanên dawîn de têkiliyên wan Iraq jî di nav de bi hemû aliyan re hene.
Fermandara YPJê Rohilat Efrîn jî wiha got: “Tirkiye serkêşiya van êrîşan dike û diyar kir ku YPJ’ê dê parastina gel bidomîne, Hêza Parastina Şêxmeqsûd û Eşrefiyê û Yekîneya Şehîd Avesta Xabûr û Yekîneya Şehîd Jiyan Tohildan li eniyên pêş in”
Rohilat Efrîn anî ziman ew ê hemû hewldanan bikin heya şervanên dîlgirtî yên ketine destê çeteyan rizgar bikin.
