HSD’ê bi daxuyaniyekê encama şer û pevçûnên 24 saetên dawî aşkera kir. Di daxuyaniyê de HSD’ê diyar kir ku hêzên dagirker tevî agirbestê jî êrîşên xwe didomînin û hêzên wan jî di çarçoveya mafê xweparastinê de bersivan didin. HSD’ê got ku di nava 24 saetên dawî de gelek çete hatin kuştin û birîndarkirin
Navenda Ragihandinê ya Hêzên Sûriyeya Demokratîk (HSD) têkildarî şer û pevçûnên di navbera hêzên wan û hêzên dagirker ên dewleta tirk û çeteyên wê yên li gundên Zirgan, Girê Spî û Kobanê daxuyaniyeke nivîskî parve kir. HSD’ê destnîşan kir ku tevî ku hêzên wan ên parastina sînor di çarçoveya rêkeftinê de derbasî rewşa parastinê bûne jî, artêşa dagirker û komên çete yên wê êrîşên xwe didomînin. HSD’ê da zanîn ku hêzên dagirker êrîşên xwe li gelek herêman berfireh kirine û hêzên wan jî di çarçoveya parastina rewa de bersiv didin.
Daxuyaniya HSD’ê wiha dom kir:
“ENIYA ZIRGANÊ
* Artêşa dagirker bi 50 seyareyan li derdorê gundên Eyn El Hewa û Xirbet Cimo xwestin êrîş bibin ser çeperên hêzên hikûmeta Sûriyeyê û gundên li derveyî agirbestê û dagir bikin. Hêzên me bi armanca parastina van gundan bersiv dan êrîşan û di encamê de şer qewimî. Di encama şerê li vê herêmê û gundê Til El Werdê de hejmarekê zêde ya çeteyan hate kuştin û birîndarkirin. Her wiha wesayîteke kar hate rûxandin.
ENIYA GIRÊ SPÎ Û KOBANÊ
* Artêşa dagirker û komên çete bi hejmareke mezin û bi piştevaniya hêza hewayî li gundên Evdikê, Çariqlî û Berberiyê êrîş kirin û hewl dan herêmên nû dagir bikin. Hêzên me di çarçoveya parastina rewa de bersiva hemû êrîşan dan û di encamê şerên giran qewimîn. Li hemû eniyan êrîşên dagirkeran hatin şikandin.
* Di bersivdana hêzên me de bi dehan çete hatin kuştin û birîndarkirin.
* Her wiha di şer û pevçûnan de 5 hevalên me jî birîndar bûn.”
