HSD’ê bi daxuyaniyekê bîlançoya şerê roja 35’emîn a Berxwedana Rûmetê parve kir. HSD’ê da zanîn ku dagirkeran li gelek deveran xwestin dagirkeriya xwe berfireh bikin. HSD’ê diyar kir ku di şer de 4 şervanên wan şehîd û 7 jî birîndar bûne
Navenda Ragihandinê ya Hêzên Sûriyeya Demokratîk (HSD) bi daxuyaniyekê encama şer û pevçûnên di roja 35’emîn a Berxwedana Rûmetê de aşkera kir. HSD’ê diyar kir ku di roja 35’an de jî êrîşên artêşa tirk û çeteyên wê berdewam kirin û hewl dan ku dagirkeriya xwe berfireh bikin.
Daxuyaniya HSD’ê wiha dom kir:
“ZIRGAN
* Komên çete yên girêdayî artêşa tirk a dagirker hewl dan ku li gundên Bab El Xêr û Ebdilheyê êrîşî herêmên sîvîlan bikin û dagirkeriya xwe berfireh bikin.
TIL TEMIR
* Komên çete bi piştevaniya êrîşên hewayî yên artêşa tirk a dagirker hewl dan ku êrîşî herêmên Rihaniyê, Qasimiyê, Erbeîn, Amiriyê, Feyseliyê, Minehir û Mehmûdiyê bikin. Hêzên dagirker li seranserê vê xetê bi balafirên bêmirov bombebaran pêk anîn û herêm bi çekên giran topbaran kir.
EYN ÎSA
* Komên çete yên girêdayî dewleta tirk bi piştgiriya êrîşên hewayî û topbarana artêşa tirk, êrîşî gundên Mesûdiye, Genteriyê û Hoşayê kirin. Dagirkeran hewl dan ku herêmên sivîlan dagir bikin. Her wiha dagirkeran xwestin bi seyareyên leşkerî nêzî herêma Xefetsalim bibin û gund dagir bikin.
* Di van êrîşan de bi giştî 4 hevalên me şehîd bûn û 7 hevalên me jî birîndar bûn.”
