HSD’ê bi daxuyaniyekê ragihand ku hêzên dagirker ên artêşa tirk û çeteyên wê bi çekên giran û balafirên biçek ên bêmirov êrîşî seranserî xeta eniyê kir. HSD’ê da zanîn ku di encama êrîşan de 2 şervanên wan şehîd bûne
Navenda Ragihandin û Çapemeniyê ya Hêzên Sûriyeya Demokratîk (HSD) bi daxuyaniyekê encamên şer û Bexwedana Rûmetê ya roja 38’emîn aşkera kir. HSD’ê da zanîn ku di roja 38’emîn a Berxwedana Rûmetê de jî artêşa tirk a dagirker û çeteyên wê gelek herêm bombebaran kirin.
HSD’ê destnîşan kir ku artêşa tirk a dagirker û komên çete bi hemû cureyên çekên giran û balafirên bêmirov li seranserê xeta eniyê êrîşên xwe yên dagirkeriyê domandin. Daxuyanî wiha dom kir:
“TIL TEMIR
* Artêşa tirk a dagirker û komên çete li gundên Ing El Hewa, Mehmûdiyê, Qasimiyê û Rihaniyê bi çekên giran, tank, top û balafirên bêmirov êrîşî herêmên sivîlan kirin û xwestin ku qadên nû dagir bikin. Komên çete bi obus û hewanan êrîşî çeperên hêzên Meclisa Leşkerî ya Suryan kir. Balafirên biçek ên bêmirov jî herêm bombebaran kirin.
EYN ÎSA
* Artêşa tirk a dagirker û komên çete yên wê bi çekên giran û balafirên bêmirov êrîşî bendên kontrolê yên li ser rêya M4 a navdewletî, gundên Tîna û Qizalî kirin. Artêşa tirk a dagirker dîsa ev herêm bi balafirên bêmirov bombebaran kir.
* Di êrîşên artêşa tirk a dagirker de bi giştî 2 hevalên me şehîd bûn.”
