HSD’ê bi daxuyaniyekê ragihand ku hêzên dagirker ên dewleta tirk û çeteyên wê di roja 70’yemîn a berxwedanê de jî êrîşên xwe domandin. HSD’ê da zanîn ku li gundê Mişêrfayê dema ku çeteyan amadekariya êrîşê dikir, teqemeniyek di nav wan de teqiyaye û 3 çete mirine
Navenda Ragihandin û Çapemenyê ya Hêzên Sûriyeya Demokratîk (HSD) bi daxuyaniyekê encamên roja 70’yemîn a Berxwedana Rûmetê parve kir. Di daxuyaniyê de HSD’ê diyar kir ku artêşa tirk a dagirker li seranserê herêma rojavayê Kurdistanê û bakurê Sûriyeyê êrîşên xwe yên bi tank, top û çekên giran domand.
Daxuyanî wiha dom kir:
“EYN ÎSA
* Artêşa tirk a dagirker û çeteyên wê li herêma Eyn Îsa û gundewarên wê û her wiha li ser rêya M4 tevgera xwe ya dagirkeriyê domand. Komên çete bi çekên giran êrîşî gundên Bîr Kîno, Genteriyê, Kefîfa, Tirwaziyê û her wiha herêmên li derdora rêya M4’ê kir. Artêşa dagirker bi çekên giran û tankan zêdetirî 30 caran êrîşî gundên Xirbit Baqer, Mitmeşrîc û Xafiyayê kir. Di encama êrîşan de ziyanên madî gihîştin zevî û milkên welatiyên sivîl. Artêşa tirk bi hemû hêza xwe hewl dide beşên rêya M4’ê ya navdewletî dagir bike.
* Artêşa tirk a dagirker ji 17’ê mehê ve bi konvoyên çekên giran di embarên genim ên Şergirakê de diziyê, dike. Di nav 3 rojan de bi alîkariya komên çete, piraniya genimê di embarên genim de hate talankirin.
AMÛDÊ
* Komên çete yên artêşa tirk a dagirker li gundê Mişêrfê ya Amûdê dema di amadekariya êrîşan dikir, alavên teqemeniya xwe di nava xwe de teqandin. Li gorî agahiyên ku bi dest me ketine, herî kêm 3 çete di teqînê de mirin û hejmareke ji çeteyan jî birîndar bûn.
DÊRIK
* Artêşa tirk a dagirker bi çekên giran êrîşî gundên Etebê û Dêrna Axê kir. Di encama êrîşan de ziyanên madî gihîştin milkên welatiyan.”
