HSD’ê bi daxuyaniyekê ragihand ku hêzên artêşa tirk a dagirker û çeteyên wê di roja 51’emîn a Berxwedana Rûmetê de jî gelek herêm bi çekên giran hedef girtin. HSD’ê îdiaya dewleta tirk ku di got ku di encama êrîşa HSD’ê de li Kaniya Xezalan 2 leşker hatine kuştin jî derewand
Navenda Ragihand û Çapemeniyê ya Hêzên Sûriyeya Demokratîk (HSD) bi daxuyaniyekê encamên şer û berxwedana roja 51’emîn a Berxwedanê Rûmetê aşkera kir. HSD’ê diyar kir ku di roja 51’emîn a berxwedanê de jî êrîşên dagirkeriyê yên dewleta tirk û çeteyên wê yên li ser herêmê domiyan.
Daxuyanî wiha dom kir:
“TIL TEMIR
* Artêşa tirk a dagirker li gelek gundên Til Temirê bi piştevaniya çekên giran êrîşên giran bir ser herêmên sîvîl. Her wiha balafirên bêmirov tevgera xwe domandin. Komên çete li gundên Qasimiyê, Dawûdiyê, Til Cimo û li ser rêka di navbera Êrîşa û Salihiyê de bi top û tangan êrîş pêk anîn.
EYN ÎSA
* Artêşa tirk a dagirker bi awayeke bê ser û ber herêma Eyn Îsa, rêya M4 a navdewletî û gundewarên Eyn Îsayê da ber obus û tangan û faaliyetên keşfê yên bi balafirên bêmirov berdewam kir. Artêşa dagirker çeperên hêzên me, hêzên artêşa Sûriyeyê û herêmên sîvîl ên li gundên Şêrgirad, Ebû Sire û rêya M4 topbaran kir. Her wiha artêşa tirk bi çekên giran êrîşî gundên Cideydê û Bîr Kîno yên ser bi herêma Qiz Alî ve kir. Hêzên artêşa Sûriyeyê jî bersiv da van êrîşan.
* Artêşa tirk a dagirker îdia dike ku di roja 27’ê mijdarê de 2 leşkerên wan li Kaniya Xezalan di encama lêdana hawanan de hatine kuştin. Lê belê ev îdia derewe û hêzên me li dijî vê herêmê tu êrîş pêk ne anîne. Artêşa dagirker mirina leşkerên xwe yên ku li cihên cuda mirîne, weke ku hêzên me kuştibin radigihîne. Bi vî awayî hewl dide binpêkirina xwe ya agirbestê rewa bike.”
