HSD’ê bi daxuyaniyekê bîlançoya şer û berxwedana sala 2019’an bi raya giştî re parve kir
Navenda Ragihandin û Çapemeniyê ya Hêzên Sûriyeya Demokratîk (HSD) encama şer û berxwedana 2019’an bi daxuyaniyeke nivîskî bi raya giştî re aşkera kir.
Daxuyaniya HSD’ê wiha ye:
“Gelên rojavayê Kurdistanê û bakurê Sûriyeyê di sala 2019’an de bi armanca parastina azadî û rûmeta xwe, pêşengiya têkoşîneke şoreşgerî ya bê hempa kir. Îro berxwedana me, bi qasî ku bi armanca parêzgeriya nirxên bingehîn ên mirovahiyê, xeteke azadîxwaz û enteryasnonalîst pêş xist, bi şerê li dijî artêşa tirk a dagirker jî pêşengiya têkoşîna neteweyî kir.
Hêzên me di sala 2019’an de rêxistina terorî ya DAIŞ’ê bi bin xist û dawî li serweriya wê ya koledar anî. Ji bo parastina aramî û ewlehiya herêmê û niştecihên wê, HSD’ê li hemberî her cure êriş, komplo, dagirkerî û terorê bi erka xwe ya parastina rewa rabû, bêyî ku didil bimîne pêk anî.
Di 23’yê adarê de li gundê Baxoz ê Dêrezorê, rêxistina terorî ya DAIŞ’ê bi temamî hate paqijkirin. Bi wî awayî serdemeke dirêj bi dawî bû û aramî li herêmê serwer bû. Di sala 2019’an de encama vî şerî û operasyonên ku hêzên me li dijî şaneyên veşartî pêk anîn wiha ye;
– Li herêma Dêrezorê, bajarokê Hecîn û derdorê wê hatin rizgarkirin.
– Di şerê 3 mehan de bi kêmanî hezar û 306 çete hatin kuştin.
– Zêdetirî 29 hezar û 600 çete û malbatên wan (Ji Iraq, Sûriye û ji her deverê cîhanê hatin binçavkirin).
– 7 hezar km2 xak ji terorê hate paqijkirin.
– Hejmareke gelekî zêde çek, cebilxane, dokuman, amûrên pêwendiyê hatin desteserkirin.
– Bi zêdetirî 40 operasyonên antî-terorê, pêşî li hejmareke hewldanên komkujî û êrîşan hatin girtin.
– Bi 4 çalakiyên li dijî şaneyên veşartî yên ser bi MÎT’a tirk ve hewldanên têkbirina aramiya herêmê vala hatin derxistin.
– Di encama van operasyon û berxwedana bidawîkirina DAIŞ’ê de 256 hevalên me bi lehengî şer kirin û şehîd bûn.
Di çarçoveya plansazî û xebatên demdirêj de di navbera hêzên me, hevpeymaniya navdewletî û Amerîkayê de, hêzên me bi tevkariyeke mezin tev li operasyona serçeteyê DAIŞ’ê El Bexdadî li herêmên di bin dagirkeriya Tirkiyeyê yên li Bakur û Rojavayê Sûriyeyê de bûn. Di encamê de El Bexdadî hate kuştin.
Bi bidawîkirina terora DAIŞ’ê ve artêşa tirk a dagirker êrîşên dagirkeriyê yê li ser rojavayê Kurdistanê da destpêkirin.
Artêşa tirk a dagirker û komên çete yên wê di 9’ê cotmeha 2019’an de, bi armanca dagirkirina xaka rojavayê Kurdistanê û bakurê Sûriyeyê êrîş da destpêkirin. Dewleta dagirker bi hezaran çete, tang, çekên giran, balafirên şer û firokeyên bêmirov êrîş bir ser seranserê xeta sînorê rojavayê Kurdistanê. Di encam de bi sedhezaran sivîlên herêmê ji cîhê xwe bûn, şehîd ketin û birîndar bûn.
Artêşa dagirker bêyî ku ferq û cudahiyê bixe navberê, hemû herêmên sivîl ên li ser sînor, kirin armanc û bê ser û ber topbaran kirin.
Me jî weke HSD’ê di çarçoveya parastina rewa de bersiva van êrîşan da. Encamên şer û berxwedanê wiha ye;
– Artêşa dagirker di sala 2019’an de bi giştî 379 êrîşên hewayî yên bi drone û balafirên şer pêk anî.
– Hezar û 21 êrîşên bejahî yên bi tang, top, obus û cur bi cur çekên giran pêk anî.
– Hêzên me di çarçoveya parastina rewa de bersiva hemû êrişan da û di encam de li seranserê sînor şer rû da. Di van şeran de;
– Hezar û 534 çete û leşkerên artêşa dagirker hatin kuştin, 294 çete û leşker birîndar bûn.
– Di encama bersivdayîna hêzên me de 7 tang, 17 panzer, 11 BMP, 42 seyareyên leşkerî, 27 seyareyên leşkerî, 11 seyareyên doçkbarkirî, 2 seyareyên kar û 2 motor hatin rûxandin.
Artêşa dagirker û komên çete yên bi ser ve piştî ragihandina biryara agirbestê jî êrîşên xwe nesekinandin, rêkeftinên ku hatine çêkirin bin pê kirin û li gelek qadan êrîşên xwe yên bejahî û hewayî domandin.
– Di berxwedana li hemberî artêşa tirk de bi giştî;
– 508 hevalên me bi awayekî lehengî li ber xwe dan û şehîd bûn.
– Hezar û 547 hevalên me birîndar bûn.
– 73 hevalên me dîl ketin.
– Di encama êrîşên artêşa dagirker li ser herêmên sivîlan de zêdetirî 400 hezar sivîl koçber bûn. Her wiha di topbaran û bombebaranê de 522 sivîl şehîd bûn, 2 hezar û 757 sivîl birîndar bûn. Di nav şehîd û birîndarên sivîl de hejmareke zêde ya zarokan jî heye. Di encama van êrîşan de bajarên Serêkaniyê, Girê Spî û qada di navbera her du bajaran de hatin dagirkirin.
Yekîneyên YPJ’ê, di dirêjahiya sala 2019’an de, hem di têkoşîna li dijî terora DAIŞ’ê û hem jî ya li dijî êrişên artêşa tirk a dagirker de roleke girîng lîstin.”
