Komên çete yên El Nusra û DAIŞ’ê êrîşî gundên Serêkaniyê kirin. Li ser bersivdayîna şervanên HSD’ê jî li herêmê şerekê dijwar qewimî. Di şerê ku heta niha didome de 2 wesayît hatin rûxandin û gelek çete hatin kuştin
Êrîşên hêzên artêşa tirk a dagirker û çeteyên wê yên li dijî rojavayê Kurdistanê didomin. Di vê çarçoveyê de hêzên dagirker êrîşî gundên Serêkaniyê kir.
Li gorî agahiyên ji Serêkaniyê, leşkerên artêşa tirk a dagirker û çeteyên wê hewl dan êrîşî gundê Til Diyab ê Serêkaniyê bikin. Li ser vê yekê jî şervanên Hêzên Sûriyeya Demokratîk (HSD) bersivên tund dan û hewldana çeteyan têk bir. Hat zanîn ku di encama bersivdayîna şervanan de wesayîteke doçkabarkirî û wesayîteka bi cureya Megzemîn hatin teqandin. Di şer de gelek çete jî hatin kuştin û birîndarkirin.
Çavkaniyên ji herêmê ragihand ku komên çete yên El Nusra û DAIŞ’ê vêcarê jî bi çekên giran êrîşî gundê Bab Xêr ê Zirgan a Serêkaniyê kir. Hat zanîn ku şervanên HSD’ê û hêzên rejîma Sûriyeyê ku vê sibehê gihiştin gund bersivên tund dan. Di şerê ku heta niha didome de leşkerekê rejîma Sûriyeyê birîndar bû. SERÊKANIYÊ
