Navenda Nûçeyan |
Fermandariya Giştî ya Hêzên Sûriyeya Demokratîk (HSD) têkildarî komkujiya duh a dewleta tirk a li gund Sefawiyê ya Eyn Îsa ku ji heman malbatê 4 kes qetil û dayik û keçek birîndar kirin, daxuyaniyek da.
Daxuyaniya HSD’ê wiha ye:
“Dewleta tirk a dagirker sûceke din li rêzesûcên xwe yên li dijî gelê me yê Bakur û Rojhilatê Sûriyeyê zêde kir. Tankên dewleta tirk duh gundê Sefawiyê yê rojhilatê Eyn Îsayê yê tijî sivîl û koçberên Girê Spî, topbaran kir. Di encamê de 4 sivîl ji malbatekê şehîd bûn ku 3 ji wan zarok bûn.
Ev sûcê hov teqez dike ku dewleta tirk bi israr e ku şer û koçberkirina şêniyên herêmê yên resen bidomîne, da ku herêmên din ên Sûriyeyê dagir bike. Dewleta tirk bi vê yekê lihevkirinên berê yên bi dewletên herêmî yên têkildar re û di sêrî de Rûsya û Amerîkayê re, binpê dike.
Em vê sûcê şermezar dikin. Di heman demê de em sersaxiyê ji malbatên qurbaniyan û gelê xwe re dixwazin. Em bang li hêza garantor Rûsya dikin ku berpirsyariyên xwe pêk bîne û binpêkirinên dewleta tirk rawestîne. Em piştrast dikin ku em ê mafê xwe yê parastina rewa û parastina gel û herêmên xwe li dijî wan destdirêjiyan pêk bînin. Em bang li civaka navneteweyî û rêxistinên mafên mirovan ên navneteweyî dikin ku binpêkirina mafên mirovan ji aliyê dewleta tirk a dagirker û çeteyên wê ve bişopînin û sûcdaran radestî dadgehên navneteweyî bikin.”
