Navenda Nûçeyan |
Hêzên Sûriyeya Demokratîk (HSD) di 10`ê hezîrana 2020`an de destpêkirina qonaxa yekemîn a Pêngava Tunekirina Terorê li gundewarên Hesekê û Dêrazorê ragihandibû û di encamê de 110 çete hatibûn girtin.
Îro jî Navenda Ragihandina HSD’ê bi daxuyaniyeke nivîskî ragihand ku ew dest bi qonaxa duyemîn a pêngavê kirine.
Di daxuyaniya HSD’ê ku li ser malpera xwe ya fermî parve kir, wiha ye:
“Hêzên me vê sibehê 17`ê tîrmeha 2020`an qonaxa duyemîn a Pêngava Tunekirina Terorê ya li dijî şaneyên DAIŞ`ê li herêmên Dêrazorê dan destpêkirin.
Pêngava me li ser daxwaza şênî û rûspiyên êlên herêmê ji bo tunekirina şaneyên DAIŞ`ê yên ku ewlehiya herêmên Dêrazorê binpê dikin, hat. Bi taybet piştî ku êrîşên DAIŞ`ê li dijî sivîlan zêde bûn.
Yekîneyên Antîterorê, hêzên Koalîsyona Navdewletî tev li vê pêngavê dibin tevî piştevaniya asîmanî. Ev pêngav dê heta pêkanîna armancên ku fermandariya giştî diyar kirine, berdewam bike.”
